British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Sul, 21 Tachwedd 2010, 09:20 GMT
Gweithgareddau opera dwyieithog yn y gogledd

Aelodau Cwmni Opera Cenedlaethol Cymru yn Llandudno
Rhai o aelodau'r Cwmni Opera Cenedlaethol yn Llandudno

Dywed Cwmni Opera Cenedlaethol Cymru ei fod am gynnal nifer o weithgareddau mewn lleoedd llai cyfarwydd yn y gogledd.

Dros y pedair blynedd nesaf fe fydd y cwmni yn creu "canolbwynt o weithgarwch ar gyfer cynulleidfaoedd lleol" drwy gyfrwng y Gymraeg a'r Saesneg.

Ymhlith y gweithgareddau y mae perfformiad o waith newydd a phrosiectau eraill.

Ers bron i 60 mlynedd mae'r cwmni wedi bod yn perfformio'r prif gynyrchiadau yn Llandudno, ond y bwriad nawr yw ehangu'r ddarpariaeth drwy'r gogledd a hynny mewn lleoedd llai cyfarwydd.

Yn ôl y cwmni fe fydd artistiaid o Gymru'n ymuno â chantorion a cherddorion i weithio ar brosiectau a'u datblygu, gan gynnwys Miriam Bowen, Annette Bryn Parri, Jenny Pearson ac Angharad Lee.

"Dyma fydd y tro cyntaf i'r cwmni gynnig cynllun mor ganolog o weithgarwch yn y gogledd," meddai Rhian Hutchings, cyfarwyddwraig WNO MAX.

Beibl William Morgan

"Bydd pawb, o blant ysgol gynradd i bobl sy'n mynd yn rheolaidd i'r ganolfan gymunedol, yn cymryd rhan.

Mae'r syniad o greu cymuned o gantorion yn y gogledd....yn un cyffrous iawn
Rhian Hutchings, Cyfarwyddwraig WNO MAX

"Bydd diwrnodau canu mewn nifer o fannau, datganiadau a'r cyfle i ymuno â chôr cymunedol a fydd yn cymryd rhan yn y perfformiad cyntaf erioed o Gair ar Gnawd."

Gwaith newydd gan y cerddor Pwyll ap Sion a'r bardd Menna Elfyn yw Gair ar Gnawd a fydd yn cael ei berfformio yng ngwanwyn 2012.

William Morgan, cyfieithydd y Beibl i'r Gymraeg yn yr 16fed ganrif, sydd wedi ysbrydoli'r gwaith newydd.

Bydd libretto Menna Elfyn yn canolbwyntio ar ddau brif gymeriad, sef cyfieithydd yn byw yng Nghymru heddiw sy'n brysur yn cyfieithu'r Beibl i nifer o ieithoedd eraill, a merch ifanc sy'n gweithio fel tatŵydd ac sy'n llythrennol yn troi'r gair yn gnawd drwy gyfrwng ei chelfyddyd o beintio ar y cnawd.

Caiff y cwmni arian gan Sefydliad Esmee Fairbairn i lunio blwyddyn baratoi o weithgareddau yn 2011 a fydd hefyd yn cyfrannu at Flwyddyn Ddiwylliant Wrecsam.

Profiadau

Bydd cyfres o ddiwrnodau yng Nghaergybi, Caernarfon, Yr Wyddgrug a Wrecsam.

Un uchafbwynt fydd Cyngerdd Cerddorfaol Ysgolion ym mis Mehefin 2011 yn Neuadd William Aston ym Mhrifysgol Glyndŵr wrth i bobl ifanc ymuno â cherddorfa cwmni OCC.

"Mae opera'n gyfrwng gwych i adrodd storïau wrth gynulleidfa newydd, gan dynnu ar brofiadau sy'n helpu llunio'u bywydau," ychwanegodd Ms Hutchings.

"Rydyn ni am glywed y storïau hyn yn cael eu hadrodd yn Gymraeg ac yn Saesneg, felly bydd Gair ar Gnawd yn rhoi ar ganol y llwyfan ddigwyddiad allweddol yn hanes diwylliant Cymru sy'n dal yn berthnasol heddiw .

"Mae'r syniad o greu cymuned o gantorion yn y gogledd i ymuno â ni mewn prosiectau yn y dyfodol yn un cyffrous iawn."



CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific