British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Llun, 8 Tachwedd 2010, 06:56 GMT
Canser: Ymchwil yn cynnig gobaith

Cell canser y prostad
Cell canser y prostad

Gallai llai o ddynion farw o ganser y prostad drwy gael triniaeth radiotherapi yn ogystal â hormonau yn ôl ymchwil newydd gan Brifysgol Caerdydd.

Mewn profion lleol ar 1,200 o ddynion oedd yn diodde o ganser, arweiniodd radiotherapi at 43% yn llai o farwolaethau dros gyfnod o saith mlynedd.

Cafodd bob un o'r dynion driniaeth hormonau, sy'n defnyddio cyffuriau i atal testosterone rhag megino'r canser.

Ond fe gafodd hanner y dynion radiotherapi yn ogystal.

Mae'r canlyniadau cynnar yn dangos fod 79% o'r dynion gafodd driniaeth hormonau yn unig yn dal yn fyw saith mlynedd yn ddiweddarach, ond roedd 90% o'r rhai gafodd radiotherapi hefyd wedi goroesi.

'Mwy i gael cynnig'

Mae triniaeth hormonau yn gweithio'n dda, ond mae rhai dynion yn peidio ymateb i'r driniaeth dros gyfnod hir.

Arweinydd yr ymchwil yw'r Athro Malcolm Mason o Brifysgol Caerdydd. Dywedodd:

"Mae'r canlyniadau cyffrous yma yn dangos yn glir fod radiotherapi yn cynyddu'r gobaith i ddynion sy'n diodde o ganser y prostad.

"Ar hyn o bryd, rydym yn amcangyfri fod 40% o ddynion yn derbyn radiotherapi yn y DU, ac rydym yn gobeithio - oherwydd y canlyniadau yma - y bydd mwy nawr yn cael cynnig y dewis yma."

Pwysig

Roedd y dynion a dderbyniodd radiotherapi yn cael triniaeth am bum niwrnod yr wythnos dros gyfnod o chwech neu saith wythnos fel cleifion allanol.

Nid yw radiotherapi yn ddewis hawdd, gan y gall gael sgîl-effeithiau tymor byr a thymor hir.

Ond dywedodd Kate Law, cyfarwyddwr ymchwil clinigol gyda Cancer Research UK: "Mae'r profion yma yn cynnig gobaith o'r newydd i filoedd o ddynion sydd â chanser y prostad, gan atal cannoedd o farwolaethau bob blwyddyn.

"Weithiau mae radiotherapi yn cael ei anwybyddu fel dewis o driniaeth, ond mae'r profion yma yn dangos pa mor bwysig y gall fod."



HEFYD
Mwy o ddynion Cymru chanser
26 Awst 10 |  Newyddion
Prostad: 'Triniaeth arbennig ar gael'
13 Chwef 07 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific