Achub cerddwyr yn Eryri

Cafodd tri oedolyn a phlentyn 11 oed eu hachub oddi ar Grib Goch

Cafodd dau dîm achub eu galw i achub cerddwyr yn Eryri dros y penwythnos.

Llwyddodd Tîm Achub Mynydd Llanberis i arwain tri oedolyn a phlentyn 11 oed oedd wedi eu caethiwo gan eira i ddiogelwch.

Roedd gan y pedwar offer priodol ond roedd y tywydd ar Grib Goch yn drech na nhw.

Llwyddodd y tîm hefyd i arwain tri o gerddwyr eraill oedd ar goll a heb yr offer priodol oddi ar un o lwybrau'r Wyddfa.

Roedd hi'n tywyllu a doedd ganddyn nhw ddim fflach lampau wrth gerdded ar hyd Llwybr Pen-y-Gwryd.

Cafodd Tîm Achub Dyffryn Ogwen eu galw i gynorthwyo dynes o Sir Gaerhirfryn oedd mewn criw o 20 o gerddwr wedi iddi lithro ger Rhaeadr Aber.

Cafodd ei chludo mewn hofrennydd gan y Llu Awyr o'r Fali i Ysbyty Gwynedd ym Mangor.

Fe wnaeth y tîm hefyd lwyddo i arwain cwpl o Essex a'u mab 5 oed oedd wedi mynd ar goll wrth ddod i lawr Tryfan.

Roedd ganddyn nhw'r offer cywir.