Archwiliadau post mortem yn dod i ben

Bronglais: Tua 200 o archwiliadau post mortem bob blwyddyn

Fydd 'na ddim archwiliadau post mortem yn unig ysbyty cyffredinol y canolbarth o'r flwyddyn nesaf ymlaen.

Dywedodd Bwrdd Iechyd Hywel Dda y byddai'r gwasanaeth yn Ysbyty Bronglais, Aberystwyth, yn dod i ben ac y byddai gwasanaeth newydd yn Ysbyty Gorllewin Cymru yng Nghaerfyrddin.

Mae trefnydd angladdau wedi dweud y gallai hyn achosi oedi i angladdau.

Dywedodd y bwrdd iechyd nad oedd symud y gwasanaeth yn fesur arbed arian ac na fyddai unrhyw oedi.

Ym mis Awst gwadodd y bwrdd eu bod am newid statws yr ysbyty ar ôl i adroddiad am golli rhai gwasanaethau gael ei ollwng i'r cyfryngau.

Roedden wedi dweud mai hen adroddiad oedd hwn.

Dim israddio

Yn sgil y datblygiad am archwiliadau post mortem, dywedodd y bwrdd iechyd nad oedden nhw'n israddio Ysbyty Bronglais.

Ychwanegodd llefarydd nad oedd swyddogion wedi derbyn cwynion oddi wrth Grwner Ceredigion am oedi i angladdau.

Bob blwyddyn mae tua 200 o archwiliadau post mortem yn cael eu cynnal ym Mronglais, yn ôl y bwrdd.

Dwi ddim yn meddwl bod y sefyllfa yn addas ar gyfer teuluoedd mewn galar Trefor Evans, trefnydd angladdau

"Fe fydd marwdy newydd yn cael ei ddatblygu yn Ysbyty Gorllewin Cymru fydd yn gallu cynnig gwasanaeth i Grwner Ceredigion yn fuan yn 2011," meddai llefarydd.

"Gall y bwrdd iechyd sicrhau'r gymuned yng Ngheredigion na fydd 'na oedi sylweddol i'r amser mae archwiliadau yn cael eu gwneud.

"Bydd modd i deuluoedd weld cyrff anwyliaid mewn lleoliad parchus o hyd yn Ysbyty Bronglais."

Dywedodd mai'r crwner oedd yn gofyn am y rhan fwya o archwiliadau ac mai fe fyddai'n penderfynu'r lleoliad.

"Ar hyn o bryd mae archwiliadau post mortem yn cael eu cynnal yn Ysbyty Bronglais ddeuddydd yr wythnos ac mae'r nifer wedi bod yn weddol gyson dros y tair blynedd ddiwethaf ...

"... mae'r mwyafrif o archwiliadau yn cael eu cynnal o fewn dau neu dri diwrnod."

'Ddim yn addas'

Dywedodd Trefor Evans, trefydd angladdau yn Aberystwyth: "Dwi ddim yn meddwl bod y sefyllfa yn addas ar gyfer teuluoedd mewn galar.

"Maen nhw wedi arfer cael archwiliadau yn Aberystwyth heb oedi.

"Roedd teuluoedd yn gallu cael gafael ar drefnydd angladdau o'u dewis a dechrau gwneud trefniadau - allan nhw ddim gwneud hynny nawr."

Ac roedd llai o archwiliadau eisoes, meddai, ym Mronglais wrth i'r crwner, Peter Brunton, anfon rhai achosion i'r Amwythig.

Fe ofynnwyd am sylw Mr Brunton.