British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Iau, 26 Awst 2010, 10:55 GMT 11:55 UK
Prif Gwnstabl yn rhybuddio am effaith toriadau

Ian Arundale
Dywed Mr Arundale nad yw'n codi bwganod

Mae un o brif heddweision Cymru wedi rhybuddio y bydd y toriadau gwariant cyhoeddus gan y llywodraeth y mwya heriol ar gyfer yr heddlu ers degawdau.

Yn ôl Ian Arundale, Prif Gwnstabl Heddlu Dyfed Powys, mae'n rhaid i'w lu ganfod arbedion o £34 miliwn rhwng nawr a 2015 a £13 miliwn bob blwyddyn wedyn.

Dywedodd nad oedd yn "codi bwganod" drwy ddweud bod 300 o swyddi mewn perygl, gan gynnwys plismyn ar y stryd.

Mae'n rhybuddio y gallai'r toriadau gael "effaith sylweddol" ar wasanaethau rheng flaen.

Mae'n derbyn bod rhaid wynebu toriadau ond ei fod yn gobeithio gwneud hynny drwy ddiswyddiadau gwirfoddol.

"Rydym yn wynebu toriadau sylweddol ac rydym eisiau bod yn onest gyda'r gymuned a'r staff y gallai gael effaith gwirioneddol ar ein gwaith plismona a chyflogi ar draws ardal Heddlu Dyfed Powys," meddai.

'Newid natur ein gwaith'

"Mae ganddo ni gynlluniau ar gyfer rhai misoedd o doriadau ac yn derbyn bod rhaid i ni wneud ein rhan.

Dwi eisiau bod yn gwbl onest gyda'r staff a'r gymuned
Ian Arundale, Prif Gwnstabl Heddlu Dyfed Powys

"Ond rydym yn teimlo bod 'na annhegwch os oes rhaid i bob llu wneud yr unfaint o doriadau, heb ystyriaeth i'r gwaith da sydd eisoes wedi ei wneud hyd yma.

"Rydym yn credu y bydd rhaid colli rhai plismyn a staff er mwyn cyrraedd y targedau."

Dywedodd y gallai lefel y toriadau newid "natur nifer o'r gwasanaethau" sy'n cael eu cynnig.

"Nid ateb galwadau brys i achosion o droseddau ydi unig waith yr heddlu," ychwanegodd.

"Efallai y bydd rhaid i ni dorri'n ôl ar rai o'n gwasanaethau.

"Mae'n mynd i fod yn amser anodd iawn i'r heddlu.

"Dwi eisiau bod yn gwbl onest gyda'r staff a'r gymuned."

Does dim modd diswyddo heddweision.

Yr wythnos diwethaf fe wnaeth Awdurdod Heddlu Gogledd Cymru gyfarfod i drafod toriadau allai arwain at golli cannoedd o swyddi.

Dywedodd Prif Gwnstabl Heddlu Gogledd Cymru, Mark Polin, ei fod yn disgwyl gweld tua 250 o swyddogion yn gadael a neb yn dod yn eu lle.



CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific