British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Mercher, 4 Awst 2010, 19:44 GMT 20:44 UK
Meddalwedd defnyddiol yn Gymraeg

Catrin Dafydd a Gareth Lewis
Catrin Dafydd a Gareth Lewis yn lansiad y Llais Synthetig Cymraeg

Fe fydd meddalwedd newydd yn caniatáu i bobl ddall a golwg rhannol ddefnyddio'r un dechnoleg fodern ag unrhyw un arall.

Cafodd meddalwedd llais awtomatig ei lansio gan RNIB Cymru ar Faes yr Eisteddfod ddydd Mercher.

Fe fydd yn caniatáu i wybodaeth ar sgriniau cyfrifiaduron gael ei ddarllen yn uchel.

Ar y maes cafodd y fersiwn gynta o'r llais ei glywed yn darllen nofel Catrin Dafydd, Pili Pala.

Yr elusen sydd wedi datblygu Llais Synthetig Cymraeg er mwyn helpu pobl ddall a golwg rhannol i gael gwybodaeth o wefannau Cymraeg.

Yn ogystal â phori gwefannau Cymraeg, fe fydd modd i bobl lawrlwytho llyfrau Cymraeg ac ysgrifennu a derbyn negeseuon testun yn Gymraeg.

Pili Pala
Y llais yn darllen cyfrol Pili Pala

Yn y lansiad roedd RNIB Cymru, Alun Ffred Jones, Gweinidog Treftadaeth Cymru, Leighton Andrews, Gweinidog Addysg Cymru, Catrin Dafydd, yr actor Gareth Lewis sy'n defnyddio adnoddau'r elusen yn ogystal â datblygwyr y meddalwedd.

Dywedodd Sarah Rochira, Cyfarwyddwr RNIB Cymru, bod hwn yn ddathliad o'r hyn sydd ar gael i ddeillion a rhai â golwg rhannol drwy gyfrwng y Gymraeg.

"Am y tro cyntaf gallwn ddathlu gallu cael mynediad a gwneud popeth fyddwn ni'n dymuno ei wneud a hynny drwy gyfrwng y Gymraeg.

"Cyn hyn doedd dim modd darllen gwefannau Cymraeg, negeseuon a llyfrau.

"Fe fydd y meddalwedd yn caniatáu i gyfrifiaduron siarad gyda'r defnyddiwr yn Gymraeg."

Mae'r meddalwedd ar gael am ddim i gyrff cyhoeddus y tu allan i'r sector addysg ac yn rhoi mynediad llawer gwell i wybodaeth yn Gymraeg i bobl o bob oed.

Wedi clywed rhan o'i nofel Pili Pala yn cael ei ddarllen gan lais synthetig dywedodd Catrin Dafydd:

"Mae hi'n fraint ofnadwy fod fy ngwaith yn rhan o brosiect mor gyffrous.

"Yn aml wrth wneud gwaith creadigol, rwy'n meddwl am gyfathrebu a chyrraedd cymaint o bobl ac felly mae unrhyw gyfle i gyrraedd cynulleidfaoedd Cymraeg newydd yn gyffrous."

Ychwanegodd Gareth Lewis, Meic Pierce o Bobol y Cwm, ei fod yn hynod o ddiolchgar am waith yr elusen.

"Fel defnyddiwr dwi'n ddiolchgar iawn iawn am yr adnodd gwych yma.

"Mae'n werth ei gael a dwi'n arbennig o ddiolchgar i'r cynulliad am y gefnogaeth ac arian a roddwyd i'r fenter ac i sicrhau nad yw pobl gyda methiannau o unrhyw fath yn cael eu gadael ar ôl yn yr oes dechnolegol gyflym iawn iawn yma."

"Ychydig iawn o ddeunyddiau sydd ar gael yn Saesneg ac mae'r ddarpariaeth yn Gymraeg llawer llai," meddai Alun Ffred Jones.

"Dwi'n hynod o falch bod yr elusen wedi gallu datblygu'r meddalwedd yma.

"Fe fydd modd ei ddefnyddio mewn sawl ffordd a sicrhau y bydd pobl ddall a golwg rhannol yn gallu gwneud gweithgareddau drwy'r Gymraeg.

"Mae'n hanfodol bod technolegau fel hyn ar gael drwy gyfrwng y Gymraeg i sicrhau bod pawb yn cael gwasanaethau hanfodol yn eu dewis iaith."




Tudur Hallam Cadair Tudur
Tudur Hallam enillodd Gadair y Brifwyl

GWEFANNAU



Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific