Teyrnged teulu ar ddiwrnod angladd milwr

Y gwasanaeth angladdol yn Eglwys Santes Fair Caerfyrddin

Mae teulu milwr wedi bod yn rhoi teyrnged bellach iddo ar ddiwrnod ei angladd, gan ei ddisgrifio fel dyn "dewr, gwrol a ffyddlon".

Cafodd Samuel Robinson, 31 oed, o bentref Bronwydd ger Caerfyrddin, ei ladd mewn ffrwydrad yn Afghanistan ar Orffennaf 8.

Roedd tua 300 yn bresennol yn y gwasanaeth angladdol yn Eglwys Santes Fair, Caerfyrddin, ddydd Gwener.

"Fe wnaeth o gyffwrdd â chalonnau pawb wnaeth gwrdd ag e, roedd e'n garedig ac yn llawn trugaredd," meddai ei rieni Alison a Dennis mewn datganiad.

'Dyheadau'

"Roedd yn arweinydd naturiol, wastad yn barod i amddiffyn y gwan.

"Fe fyddai'n rhoi i eraill heb feddwl ddwywaith, does yna ddim dyn gyda chalon mwy.

Milwr 'dewr, gwrol a ffyddlon'

"Cafodd ei gymryd oddi wrthym yn llawer rhy gynnar."

Bu farw'r milwr oedd yn aelod o 5ed Bataliwm y Magnelwyr Brenhinol tra yn Sangin.

Ymunodd â'r fyddin yn 20 oed a dyma oedd y pedwerydd tro iddo ymweld ag Afghanistan.

"Roedd gennym gynlluniau i fynd dramor gyda Sam y flwyddyn nesa er mwyn cerdded ym Malaysia ac ymweld â Thibet," meddai ei rieni.

"Roedd ganddo hefyd gynlluniau i deithio o amgylch Ewrop.

"Mae yna gymaint oedd ganddo ar ôl i wneud a dyheadau na fydd yn cael eu gwireddu.

"Ond mae'n rhaid i ni gofio fod Sam wedi byw ei fywyd i'r etihaf."

Dywedodd y teulu fod y gymuned leol wedi bod yn gefn mawr iddyn nhw a'u bod wedi derbyn cannoedd o lythyrau a chardiau cydymdeimlad.