Cadeirydd plaid yn gadael swydd

Bu John Dixon yn gadeirydd ers 2002

Mae Cadeirydd Plaid Cymru John Dixon yn rhoi'r gorau i'w swydd wedi wyth mlynedd ddydd Iau.

Mae enwebiadau am swydd cadeirydd y blaid yn agor yn syth a byddant yn cau ar Fedi 30.

Bydd y Dirprwy Gadeirydd, Ellen ap Gwynn, arweinydd grŵp Plaid Cymru ar Gyngor Ceredigion, yn gweithredu fel cadeirydd dros dro.

Dywedodd John Dixon: "Rwyf wedi gwasanaethu fel cadeirydd ers 2002 a chan fy mod wedi penderfynu peidio â cheisio am enwebiad Gorllewin Caerfyrddin a De Penfro, rwyf wedi penderfynu hefyd ymneilltuo o'r gadeiryddiaeth a rhoi f'amser i weithgareddau eraill".

'Cyfraniad aruthrol'

Yn ôl darpar-lywydd y blaid, Jill Evans ASE: "Mae John wedi gwasanaethu fel Cadeirydd Plaid Cymru am 8 mlynedd a bu ei gyfraniad aruthrol yn rhan allweddol o lwyddiannau diweddar y Blaid.

"Mae wedi helpu i drawsnewid y Blaid yn blaid broffesiynol a chyfoes.

"Mae John yn uchel iawn ei barch gan holl aelodau'r Blaid, a bydd yn anodd iawn ei ddilyn.

"Ar ran y blaid, carwn ddiolch iddo am ei holl waith caled yn ystod y cyfnod hwn."