Cwest merch laddwyd gan giât drydannol

Y bloc o fflatiau ym Mhen-y-bont ar Ogwr gyda'r giât ar agor

Cafodd cwest ei agor i farwolaeth merch bump oed a gafodd eu lladd gan giât drydanol ym Mhen-y-bont ar Ogwr.

Ar ddechrau mis Gorffennaf bu farw Karolina Golabek ddyddie cyn ei phen-blwydd yn chwech oed.

Roedd hi tu allan i floc o fflatiau yn Brook Court yn y dref.

Dyw achos ei marwolaeth ddim yn glir eto.

Cafodd y cwest ei agor a'i ohirio yn Llys y Crwner Aberdâr.

Dywedodd y Ditectif Arolygydd Jason Redrup o Heddlu Pen-y-bont ar Ogwr wrth y crwner, Peter Maddox, bod Heddlu De Cymru a'r Gweithgor Iechyd a Diogelwch yn cynnal ymchwiliad ar y cyd.

Dywedodd eu bod yn edrych ar wneuthuriad y giât, gosod y giât a'i chynnal a'i chadw.

Mae disgwyl i'r ymchwiliad gymryd peth amser.

Mae archwiliadau post mortem wedi eu gwneud ond mae angen ymchwilio ymhellach i achos ei marwolaeth.

Cafodd y cwest ei ohirio.