Gwers fel protest yn Y Senedd

Cafodd y disgyblion wers yng nghaffi'r Senedd fel protest

Fe gafodd disgyblion Ysgol Gymraeg Treganna wers ychydig yn wahanol i'r arfer wrth iddyn nhw gynnal protest yng nghaffi'r Senedd ym Mae Caerdydd.

Mae 'na anfodlonrwydd fod Llywodraeth y Cynulliad wedi gwrthod cynlluniau Cyngor Sir Caerdydd i adrefnu ysgolion cynradd yng ngorllewin y brifddinas.

Yn ôl y protestwyr roedd 'na "fwy o le" i gynnal gwers yn y caffi nag yn yr ystafell ddosbarth.

Bu'r disgyblion yno am ddwy awr.

Rhieni o blith Grŵp Ymgyrchu Treganna, sydd wedi bod yn ymgyrchu ers dros bedair blynedd i leddfu'r broblem o ddiffyg lle yn yr ysgol, oedd yn gyfrifol am y wers.

Mae Grŵp Ymgyrchu Treganna wedi beirniadu'r Prif Weinidog Carwyn Jones am fethu datrys y sefyllfa annerbyniol bresennol.

Teimladau cryf

Maen nhw'n anfodlon bod 'na lefydd gwag mewn ysgolion cyfrwng Saesneg y ddinas a diffyg lle mewn ysgolion Cymraeg.

"Yng nghyfarfodydd diweddar grŵp ymgyrchu Ysgol Treganna a Than yr Eos mae 'na deimladau cryfion wedi eu mynegi yn dilyn penderfyniad diweddar y Prif Weinidog Carwyn Jones i wrthod cynlluniau Cyngor Dinas Caerdydd ar gyfer ad-drefnu ysgolion yn ward Treganna'r ddinas," meddai Morgan Hopkins, Cadeirydd Grŵp ymgyrchu Ysgol Treganna a Than yr Eos.

"Ar hyn o bryd dengys ffigurau'r Cyngor ei hun fod y pedair ysgol cyfrwng Saesneg yn y ward yn chwarter gwag (73%) tra bod y ddwy ysgol cyfrwng Cymraeg yn y ward yn llawn at yr ymyl gydag Ysgol Treganna yn erchyll o orlawn ac yn gorfod gweithredu ar draws tri safle.

"Mae disgyblion Treganna a Than yr Eos wedi mynd â'i neges yn uniongyrchol at y Prif Weinidog.

"Mae'n hawdd iawn iddo ef fod wedi penderfynu fel y gwnaeth ac yntau yn glyd yn adeilad y Senedd ym Mae Caerdydd, ond dylai fod yn ddigon dewr i ddod i weld drosto'i hun yr amgylchiadau gorlawn yn Ysgol Treganna a Than yr Eos."

Ym mis Mai fe wnaeth y Prif Weinidog benderfynu gwrthod cynlluniau'r cyngor i gau ysgol cyfrwng Saesneg Lansdowne yn ardal Treganna er mwyn i Ysgol Gymraeg Treganna symud i'r adeilad.

Dywedodd y byddai'r ad-drefnu yn "andwyol i safon darpariaeth addysg Saesneg".

Mae cynghorwyr Plaid Cymru a Democratiaid Rhyddfrydol, y ddwy blaid sy'n rheoli Cyngor Caerdydd, yn anhapus gyda'r penderfyniad ond mae Mr Jones wedi galw am drafodaeth synhwyrol na fydd yn arwain at rwygiadau rhwng ysgolion Cymraeg a Saesneg yr ardal.

Dywedodd mai dyletswydd y cyngor ydi meddwl am ffordd arall ymlaen a meddwl am gynllun arall.