British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Sadwrn, 26 Mehefin 2010, 10:22 GMT 11:22 UK
Wigley: 'Cyfle i gryfhau'r berthynas'

Dafydd Wigley
Wigley: 'Cyfle gwych i greu momentwm'

Mae Dafydd Wigley am i bobl Cymru a Phatagonia achub ar y cyfle i gryfhau'r berthynas rhwng y ddwy wlad wrth drefnu dathlu 150 mlynedd ers sefydlu'r Wladfa.

Cyn Aelod Seneddol Caernarfon yw Cadeirydd Pwyllgor Llywio Cymdeithas Cymru-Ariannin.

Dydd Sadwrn yn Bow Street ger Aberystwyth mae cyfarfod cyntaf y pwyllgor llywio.

Dywedodd Mr Wigley ei fod yn benderfynol o sicrhau y byddai'r dathlu yn 2015 yn rhoi cymaint o hwb i'r cysylltiad ag y gwnaeth dathlu'r canmlwyddiant.

"Mi fues i'n ffodus iawn cael mynd i'r Wladfa'n ddyn ifanc.

"A bod yn onest roedd y cysylltiad wedi bod yn edwino ers y Rhyfel Mawr.

"Er bod rhyw 5,000 o bobl yn dal i siarad Cymraeg ym Mhatagonia yn 1965 roedd y genhedlaeth honno wedi penderfynu peidio â throsglwyddo'r iaith i'w phlant.

'Ail wynt'

"Wrth i ni lanio ar lain awyr ddi-darmac yn Nhrelew, roedd 4,000 o bobl yn disgwyl amdanon ni ...

"Does dim amheuaeth bod dathliadau'r canmlwyddiant wedi rhoi ail wynt i'r Gymraeg yno ac wedi ail-danio'r diddordeb yn eu hetifeddiaeth Gymreig.

"Mae ganddon ni gyfle gwych i greu momentwm a chryfhau'r cysylltiad rhwng Patagonia a Chymru yn ystod y pum mlynedd nesa wrth i ni gynllunio'r dathliadau yn 2015.

"Ac mae'n allweddol bod y cenedlaethau i ddod yn y ddwy wlad yn cael eu haddysgu am hanes Y Wladfa".

Ymfudwyr
Ymfudwyr i'r Wladfa ar fwrdd llong SS Oricha yn 1911

Un arall yn y cyfarfod ddydd Sadwrn yw Elvey MacDonald, Llywydd Anrhydeddus Cymdeithas Cymru-Ariannin.

Fe anwyd Elvey yn Nhrelew ym 1941 i deulu o dras Gymreig a daeth i Gymru am y tro cyntaf yn 1965 fel rhan o ddathliadau'r canmlwyddiant.

Mae wedi bod yn byw yng Nghymru ers 1968.

"Dim ond chwech ohonon ni ddaeth draw i Gymru ac, yn amlwg, fe greodd y daith argraff fawr arna i.

"Does dim amheuaeth i ymweliad y Cymry â Phatagonia greu argraff aruthrol ar ddisgynyddion Y Wladfa.

"Mae traean o dir Ariannin ym Mhatagonia ac fe ddaeth yr Arlywydd Illia i'r dathliadau.

"Fe roddodd hwb i hyder y boblogaeth y gallan nhw fod yn Archentwyr go iawn a dathlu eu hetifeddiaeth Gymraeg a Chymreig yr un pryd.

"Mae'r cysylltiad rhwng Cymru a'r Wladfa wedi cryfhau dros y blynyddoedd diwethaf ac mae trefnu ar gyfer 2015 yn gyfle gwych i ni adeiladu ar hynny."



HEFYD
Patagonia: Hawl i fynd i Gymru
15 Medi 09 |  Newyddion
Pecynnau addysg i Batagonia
28 Gorff 07 |  Newyddion
Hanes glaniad Patagonia ar y we
19 Maw 07 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific