British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Llun, 14 Mehefin 2010, 06:12 GMT 07:12 UK
Disgwyl 20,000 o fyfyrwyr ar gyfer gŵyl bedwar diwrnod

Paratoadau ar gyfer yr wyl
Mae 15 milltir o ffensys o amgylch y safle

Dywed Heddlu Dyfed Powys y bydd presenoldeb plismyn yn amlwg wrth i filoedd o fyfyrwyr gyrraedd parc gwledig ar gyfer gŵyl pedwar diwrnod.

Mae trefnwyr yn disgwyl hyd at 20,000 i fynychu Gŵyl Beach Break Live ym Mharc Gwledig Penbre ger Llanelli.

Bu'n rhaid i'r trefnwyr sicrhau trwydded gan Gyngor Sir Caerfyrddin mewn gwrandawiad pedwar diwrnod cyn cael cynnal y digwyddiad.

Dywedodd yr Uwch Arolygydd Alun Harries o Heddlu Dyfed Powys eu bod wedi trefnu'n fanwl ar gyfer yr achlysur.

"Byddwn yn cynnal cyfarfodydd yng ngorsaf yr heddlu Porth Tywyn yn ddyddiol am 6pm.

"Rwy'n annog pobl i ddod i ddweud wrthym am unrhyw beth sy'n eu poeni fel y gallwn ni ddelio gyda hyn yn syth."

Trefniadau

Dywedodd y byddai pawb sy'n mynychu'r digwyddid rhwmh Mehefin 14 a 18 yn cael eu harchwilio.

Dywedodd cyfarwyddwr yr ŵyl, Ian Forshew, ei fod yn hapus gyda'r trefniadau.

Ychwanegodd y bydd yr achlysur o fudd i'r ardal.

"Mae cwmnïau lleol, fel tacsis a gwestai, eisoes wedi elwa o £750,000," meddai.

Prif artistiaid yr ŵyl fydd Vampire Weekend a Calvin Harris

Parc Gwledig Penbre
Mae'r parc ar gau i'r cyhoedd yr wythnos hon

Mae'r RNLI wedi dweud y bydd yna staff ychwanegol yn gweithio ar draeth Cefn Sidan drwy'r wythnos.

Dywedodd Phil Davies, dirprwy reolwr gyda'r RNLI: "Gyda hyd at 20,000 yn mynychu, ac yn arbennig os yw'r tywydd yn ffein, bydd yna fwy nag arfer yn mynd i'r dŵr."

Dywedodd y cynghorydd cymuned, Jonna Davies, ei bod yn siomedig bod yr ŵyl wedi cael caniatâd.

"Mae cau'r parc am wythnos i drethdalwyr lleol yn annheg.

"Rwy'n poeni am yr effaith ar fywyd gwyllt a chyflwr y safle ar ôl y digwyddiad."

Dywed trefnwyr yr wyl, Student Seed Cyf, eu bod yn gobeithio y bydd yr achlysur yn un blynyddol yn y dyfodol.

"Eleni rydym yn disgwyl y bydd busnesau lleol yn elwa £1 miliwn, a dros gyfnod o bum mlynedd fe allai dros 100,000 o fyfyrwyr ymweld â Sir Gaerfyrddin."

Mae yna 15.5 milltir o ffensys diogelwch wedi eu codi o amgylch y safle.



HEFYD
Gwyl: O blaid trwydded
30 Ebr 10 |  Newyddion
Gwyl myfyrwyr yn achosi pryder
09 Rhag 09 |  Newyddion
Trefnwyr gwyl dan y lach
27 Ebr 10 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific