British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Sadwrn, 12 Mehefin 2010, 09:08 GMT 10:08 UK
Anrheg pen-blwydd i'r caffi ucha

Yr adeilad newydd ar gopa'r Wyddfa
Cafodd y caffi ei agor ym Mehefin 2009

Flwyddyn ar ôl ei agoriad swyddogol mae caffi ucha Cymru wedi derbyn gwobrau a chanmoliaeth am ei adeiladwaith.

Bydd Hafod Eryri yn derbyn gwobr 'Prosiect y Flwyddyn' gan Sefydlaid Brenhinol o Gyfrifwyr Siartredig Cymru.

Mae'r caffi ar ben Yr Wyddfa hefyd wedi derbyn canmoliaeth uchel am ansawdd gan Sefydliad Brenhinol o Benseiri Prydeinig (RIBA).

Dywedodd Pierre Wassenaar, llywydd cangen Cymru o'r RIBA, y dewiswyd Hafod Eryri yn rhannol oherwydd "y sialens enfawr oedd ynghlwm â'i adeiladu."

"Mae'n orchest anferth," meddai.

"Mi fyddai'n ddigon anodd ei adeiladu ar lefel y ddaear - sef beth wnaethon nhw mewn gwirionedd, cyn ei ddatgymalu a'i gyrchu i fyny'r mynydd - ac felly o safbwynt ymdrech, mae'n haeddu clod."

Parc Cenedlaethol Eryri yw perchnogion yr adeilad £8.5 miliwn.

Dywedodd Prif Weithredwr Awdurdod y Parc, Aneurin Phillips, mai'r nod o'r cychwyn oedd codi adeilad y "byddai Cymru gyfan yno falch ohono."

Y tu mewn i Hafod Eryri
Mae dros 60% o'r deunydd adeiladu o Gymru

"Ers agor Hafod Eryri, mae'r ymateb yr ydym wedi ei dderbyn gan y cyhoedd wedi bod yn anhygoel.

"Bu bron i 500,00 o bobl yn ymweld â'r mynydd rhwng canol Mehefin a diwedd Hydref y llynedd - cynnydd o 27% ers y flwyddyn flaenorol."

Cynlluniwyd Hafod Eryri gan y pensaer Ray Hole i wrthsefyll tywydd eithafol iawn ar y copa, o wyntoedd yn chwythu hyd at 150 mya, dros 5m o law bob blwyddyn a thymheredd o -20°C.

Daeth dros 60% o'r deunydd adeiladau o Gymru gan gynnwys ithfaen o Flaenau Ffestiniog ar gyfer y waliau a derw Cymreig ar du mewn yr adeilad.

Fe wnaeth y gwaith o ddymchwel ac adeiladu gymryd bron i dair blynedd.

Cafodd yr hen gaffi ei ddisgrifio fel slym ucha Cymru gan y Tywysog Charles.



HEFYD
Agor canolfan ar gopa'r Wyddfa
12 Meh 09 |  Newyddion
Canolfan newydd Hafod Eryri
12 Meh 09 |  Newyddion
Pryder cwynion caffi'r Wyddfa
30 Medi 09 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific