Cais i alw i mewn cynllun tai

Roedd y gemau olaf ar y maes yn 2008

Mae cais wedi ei wneud i Lywodraeth y Cynulliad i alw i mewn cynllun dadleuol i godi 355 o dai ar hen faes rygbi Parc Y Strade yn Llanelli.

Dywedodd llefarydd ar ran y llywodraeth y byddai penderfyniad i alw i mewn ai peidio yn cael ei wneud "yn fuan".

Mae Cwmni Taylor Wimpey wedi cael caniatad amlinellol i godi tai ar y safle.

Nawr maen nhw wedi cyflwyno cynllun mwy manwl, sy'n cynnwys manylion carthffosiaeth a mynediad, i gael ei gymeradwyo.

Roedd swyddogion cynllunio Sir Gaerfyrddin wedi awgrymu y dylai'r cais gael ei gymeradwyo gan y cyngor ddydd Iau.

Ond fe ohirwyd y drafodaeth tan y bydd 'na gyfle i ymweld â'r maes ar Fehefin 24.

'Pryderus'

Mae rhai trigolion yn gwrthwynebu'r cais.

Maen nhw'n bryderus am lifogydd, problemau carffosiaeth ac mai ychydig iawn o amser sydd wedi ei roi i ystyried y cais newydd.

Cyn y cyfarfod roedd y cynghorydd lleol, Siân Caiach, wedi dweud y byddai'n gofyn i'r cais gael ei ohirio.

Fe wnaeth y Scarlets a Llanelli chwarae eu gemau olaf yno yn 2008 cyn i'r tir gael ei werthu a symud i Barc y Scarlets.

Yn wreiddiol roedd y datblygwyr eisiau codi 450 o dai ar y safle.

Cafodd sawl ymchwiliad cyhoeddus eu cynnal oherwydd gwrthwynebiadau lleol.

Fe wnaeth Llywodraeth y Cynulliad alw'r cynlluniau i mewn cyn i broblemau pellach godi gyda defnydd caeau ymarfer Parc y Strade ar gyfer codi tai.