British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Llun, 17 Mai 2010, 18:18 GMT 19:18 UK
'Angen parch rhwng y ddau gorff,' medd Cameron

Carwyn Jones a David Cameron
Dyma oedd ymweliad cyntaf Mr Cameron fel Prif Weinidog Chymru

Mae Prif Weinidog Prydain wedi dod i Gymru am y tro cyntaf yn rhinwedd ei swydd newydd.

Llai nag wythnos ers iddo gael y swydd fe gyrhaeddodd y cynulliad yng Nghaerdydd.

Yng nghwmni Ysgrifennydd Cymru, Cheryl Gillan, fe anerchodd yr aelodau Cynulliad a'r dorf yn yr adeilad ym Mae Caerdydd.

"Roedd yn bwysig i mi ddod yma yn ystod fy wythnos gyntaf i ddangos fy mharch at ddatganoli," meddai.

"Rhaid i ni wneud yn siŵr bod hyn yn gweithio a dwi'n dod yma fel Prif Weinidog clymblaid, rhywbeth newydd i'r DU ond nid i Gymru, wrth gwrs.

"Mae'n gyfnod anodd ac mae 'na benderfyniadau anodd i'w gwneud.

"Dwi'n falch o fod yn yr adeilad gwych yma."

Dwi'n credu y gall datganoli weithio, mae'n rhaid i ni wneud iddo weithio ac mae'n rhaid i Lywodraeth San Steffan a Llywodraeth y Cynulliad weithio gyda'i gilydd
Y Prif Weinidog David Cameron

Dywedodd fod angen parchu'r berthynas rhwng Llywodraeth y Cynulliad a Llywodraeth San Steffan.

"Dwi eisoes wedi siarad â'r Llywydd ac wedi dweud fy mod yn barod i ddod yma unwaith y flwyddyn er mwyn ateb cwestiynau.

"Os ydych chi eisiau rhywun o'r Trysorlys i ddod yma i drafod ar ôl cyhoeddi'r gyllideb, yna fe wnawn ni hynny ac os ydych chi eisiau rhywun i drafod Araith Y Frenhines a'r hyn mae'n ei olygu i Gymru, yna fe wnawn ni hynny."

Dylai gweinidogion Cymru, meddai, gael eu holi gan bwyllgorau Seneddol.

"Fe ddylen ni barchu ein gilydd a dysgu oddi wrth ein gilydd ... efallai bod 'na bethau sy'n cael eu gwneud yng Nghymru y dylen ni eu gwneud yn y DU ac fel arall."

'Mwy na geiriau'

Dywedodd fod 'na gyfle dechrau perthynas newydd rhwng Llywodraeth San Steffan a Llywodraeth y Cynulliad.

"Rydym yn un teulu, Yr Alban, Cymru, Lloegr a Gogledd Iwerddon a dwi ddim eisiau i ni ffraeo fel y gall teuluoedd am arian ac yn y blaen a rhaid cydweithio i gadw'n cryfder ac yn unedig ...

David Cameron yn siarad efo gweithwyr GE Avionics
Cafodd Mr Cameron gyfle i siarad gweithwyr cyn mynd i weld y gwleidyddion

"Dwi'n falch dod yma i gadarnhau bod yr hyn wnes i ei ddweud cyn yr etholiad yn dal yn berthnasol ac nad geiriau yn unig oedden nhw."

Cyn mynd i'r cynulliad fe aeth Mr Cameron i ffatri GE Avionics ar gyrion y brifddinas.

Fe ddywedodd yno: "Dwi'n credu y gall datganoli weithio. Mae'n rhaid i ni wneud iddo weithio ac mae'n rhaid i Lywodraeth San Steffan, a Llywodraeth y Cynulliad weithio gyda'i gilydd.

"Dwi eisiau i'r Deyrnas Unedig aros yn unedig ac eisiau dechrau newydd i'r berthynas rhwng y gwledydd ..."

'Adeiladol'

Wedyn cafodd Mr Cameron gyfle i siarad â Phrif Weinidog Cymru, Carwyn Jones.

Dywedodd llefarydd ar ran Llywodraeth y Cynulliad fod y ddau wedi cael "cyfarfod adeiladol".

"Fe drafodwyd nifer o faterion, gan gynnwys hyblygrwydd o ran toriadau i'r gyllideb a chynlluniau Llywodraeth San Steffan i gwtogi nifer ASau a allai effeithio ar nifer yr ACau.

"Fe drafodwyd hefyd yr angen i gadw opsiynau ar agor o ran dyddiad refferendwm cyflwyno mwy o bwerau i'r cynulliad.

"Bydd Llywodraeth y Cynulliad nawr yn ystyried y ffordd orau ymlaen."



CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific