Cartref ar dân: Carcharu dyn

Yn Llys y Goron Caerdydd fe gafodd Ratcliffe ei garcharu am ddwy flynedd

Mae dyn 20 oed wedi cael ei garcharu am roi cartref ei gariad ar dân pan oedd o dan ddylanwad y cyffur mephedrone.

Clywodd Llys y Goron Caerdydd fod Lee Ratcliffe, 20 oed, wedi cymryd y cyffur anghyfreithiol cyn ffrae â'i gariad mewn parti.

Yna aeth draw i'w thŷ ar ôl clywed "lleisiau yn ei ben" yn dweud wrtho i losgi'r tŷ i'r llawr.

Dwy awr yn ddiweddarach cysylltodd â'r heddlu gan ddweud: "Dwi allan o reolaeth - dwi wedi cymryd miaow."

'Lleisiau'

Yn y llys dywedodd yr erlynydd David Webster: "Dywedodd Ratcliffe fod lleisiau yn ei ben yn dweud wrtho am gynnau'r tân.

"Felly rhoddodd flanced ar dân mewn ystafell wely a gadael."

Gwnaed difrod difrifol i'r tŷ yng Nghwmbrân a lledodd y tân i dŷ cyfagos.

Cafodd Ratcliffe o Gwmbrân ei garcharu am ddwy flynedd ar ôl cyfaddef cynnau tân yn fwriadol gan beryglu bywyd yn ddiofal.

Dywedodd y Barnwr David Morris: "Roeddech chi'n gwybod bod y weithred yn anghywir. Yn fwy na hynny, roedd yn ddiofal.

"Nid yw bod o dan ddylanwad diod neu gyffuriau yn gwneud unrhyw wahaniaeth ac nid yw'n esgus."