British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Iau, 29 Ebrill 2010, 13:23 GMT 14:23 UK
Iaith: 'Darpariaeth resymol'

Siambr Y Senedd
Mae Aelodau Cynulliad yn craffu ar y mesur

Mae cwmni ynni sy'n gwasanaethu miloedd yng Nghymru wedi dweud wrth bwyllgor cynulliad y byddai darparu mwy o wasanaethau yn Gymraeg yn costio cannoedd o filoedd o bunnau'r flwyddyn.

Ond yn ôl Scottish Power, fe fyddai modd cynnig "darpariaeth resymol" o dan y mesur iaith heb gynnydd enfawr yn y costau.

Ar hyn o bryd mae pwyllgor Aelodau Cynulliad yn craffu ar y mesur.

Mae'r pwyllgor yn ceisio penderfynu beth fyddai'r gostv i fusnesau wrth gynnig gwasanaethau fyddai'n cwrdd â safonau cyfreithiol uwch.

'Gwasanaethau helaeth'

Dywedodd Scottish Power eu bod nhw eisoes yn darparu "gwasanaethau helaeth" yn Gymraeg yn wirfoddol ac y byddai gwneud hyn yn statudol arwain at gostau uwch.

Ond mae'r cwmni wedi croesawu'r ffaith y byddai'r mesur yn trin pawb yn y sector yr un fath.

Maen nhw hefyd wedi pwysleisio y bydden nhw am fod yn rhan o ymgynghori am y safonau y byddai eu hangen.

Mae'r mesur yn gosod dyletswydd gyfreithiol ar rai cyrff i gynnig gwasanaethau yn Gymraeg ac yn creu swydd Comisiynydd Iaith.

Fe fydd y Comisiynydd yn gallu cosbi cyrff cyhoeddus a rhai cwmnïau preifat os ydyn nhw'n torri eu hymrwymiad i'r iaith.

Pryderon

Mae disgwyl y bydd hyn yn effeithio ar gwmnïau sy'n darparu gwasanaethau cyhoeddus fel nwy, trydan a ffôn.

Eisoes mae Bwrdd yr Iaith, fyddai'n cael ei ddileu pan fydd swydd Comisiynydd Iaith yn cael ei chreu, wedi codi nifer o bryderon am y mesur.

Maen nhw'n cwestiynu pa mor annibynnol y bydd rôl y Comisiynydd oddi wrth y llywodraeth, gan bwysleisio nad yw'r patrwm hwn yn cael ei ddefnyddio mewn gwledydd eraill.

Mae'r bwrdd yn pryderu y bydd tensiynau posib rhwng rôl y Comisiynydd wrth hyrwyddo'r iaith a'r gwaith o sicrhau bod cyrff cyhoeddus a chwmnïau yn cynnal safonau.

Pan gyhoeddwyd y mesur dywedodd y Gweinidog Treftadaeth Alun Ffred Jones ei fod "... yn ateb galw'r siaradwyr Cymraeg i gael yr hawl i dderbyn gwasanaethau yn y Gymraeg ..."



HEFYD
O blaid pwerau iaith i'r Cynulliad
16 Rhag 09 |  Newyddion
Cam diweddara brwydr hir
02 Chwef 09 |  Newyddion
Cais iaith: 'Ystyriaeth lawn'
23 Meh 09 |  Newyddion
Strategaeth iaith newydd
13 Hyd 09 |  Newyddion
Cais iaith: Dechrau archwilio
12 Chwef 09 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific