Prin iawn o bobl sy'n defnyddio rhai o'r llyfrgelloedd bob wythnos
|
Mae chwech o lyfrgelloedd bach Sir Gaerfyrddin yn wynebu cau wrth i'r cyngor chwilio am ffyrdd i arbed arian. Dydi llyfrgelloedd Talacharn, Felinfoel, Hendy, Llandybie, Glanaman a Phenygroes ddim ar agor yn llawn amser eisoes. Y bwriad yw cyflwyno gwasanaeth symudol yn eu lle. Yn ôl pennaeth llyfrgelloedd y cyngor mae hi'n fwy na phosib y bydd 'na gwtogi pellach dros y blynyddoedd nesaf. Cafodd grŵp arbennig ei sefydlu gan y cyngor i edrych ar boblogrwydd llyfrgelloedd cymunedol. Maen nhw wedi cyflwyno argymhellion ynglŷn â dyfodol y gwasanaeth. Roedd y grŵp o gynghorwyr o'r farn bod y chwe llyfrgell dan sylw yn "tanberfformio", neu yn rhy agos at ganghennau eraill. Ffigyrau Yr argymhelliad felly yw cau'r llyfrgelloedd yma. "Nifer prin iawn o bobl sy'n eu defnyddio ar gyfartaledd," meddai Dewi Thomas, Rheolwr Llyfrgelloedd a Threftadaeth Cyngor Sir Caerfyrddin. "Rhwng 2 a 4 o bobl yr awr sy'n eu defnyddio ar gyfartaledd, sy'n nifer isel iawn o gymharu â llyfrgelloedd eraill.
"Rhwng 4 a 8 llyfr wedyn sy'n cael eu benthyca ar gyfartaledd. "Gwasanaeth llyfrgell deithiol fydd 'na wedyn gydag ymweliad pob pythefnos yn lle'r gangen yn yr ardaloedd yma." Dywedodd y bydd y cyngor sir yn gwerthu neu yn ailgyfeirio'r adeiladau at ddefnydd lleol. Fydd 'na ddim staff yn colli swyddi. Eglurodd Mr Thomas y bydd y staff yn gweithio yn y prif lyfrgelloedd. £34,000 y flwyddyn y bydd y cyngor yn ei arbed o gyflwyno'r newid. "Roeddem wedi gweld y broblem o'r arolwg a daw'r newid yn sgil hwnnw sydd hefyd yn cyd-fynd gyda'r agenda i arbed arian," ychwanegodd Mr Thomas. "Dwi'n ofni na fydd 'na fuddsoddiad i wasanaeth llyfrgell yn y dyfodol agos." Fe fydd y cynnig i gau'r chwe llyfrgell yn cael ei ystyried gan y cyngor llawn ar Chwefror 23, pan fydd cyllideb y flwyddyn nesaf yn cael ei thrafod.
|
Fersiwn brintiadwy
Dwi'n ofni na fydd 'na fuddsoddiad i wasanaeth llyfrgell yn y dyfodol agos
© MMIX