Angen gwario mwy ar ymchwil dementia

Dim ond 6% o'r arian ymchwil meddygol sy'n mynd tuag at ddysgu am ddementia

Mae 'na alw am wario rhagor o arian ar ymchwil sy'n ymwneud â dementia.

Mae Ymddiriedolaeth Ymchwil Alzheimer yn dweud fod gan 39,000 o bobl Cymru dementia o ryw fath.

Mae'r adroddiad yn ystyried sut mae gwariant ar ddementia yn cymharu â chyflyrau eraill fel canser.

Mae'n dangos bod y gost o ddelio gyda chyflwr fel Alzheimer bedair gwaith yn fwy.

Ond er hynny, dim ond 6% o'r arian ymchwil meddygol sy'n mynd tuag at ddysgu am ddementia.

Mae hynny'n rhwystro ymdrechion i helpu miloedd o bobl, yn ôl yr Ymddiriedolaeth Ymchwil.

Ond mae gwasanaethau i gleifion hefyd dan bwysau.

Mae'r grŵp yng Nghaerdydd yn cynnig cefnogaeth

Mae prosiect gafodd ei sefydlu gydag arian y Loteri i helpu cleifion yn eu 50au a'u 60au yn wynebu dod i ben ddiwedd mis Mawrth.

Mae Ymddiriedolaeth Iechyd Prifysgol Caerdydd a'r Fro wedi penderfynu peidio ariannu'r gwasanaeth.

Ond maen nhw'n dweud eu bod nhw wedi ymrwymo i ddatblygu gwasanaethau yn y dyfodol.

"Rydym yn deall pa mor werthfawr ydi'r gwaith sydd wedi cael ei wneud ac rwy' eisiau cadarnhau ein haddewid i weithio gyda'r gymdeithas i ddatblygu gwasanaethau a chefnogaeth i'r dyfodol," meddai Kate Norton o'r ymddiriedolaeth.

Dywedodd Alison Holmes ei bod hi a'i thad, Alun Furst, 66 oed, wedi eu siomi gan y penderfyniad.

'Edrych ymlaen'

Cafodd Mr Furst wybod ei fod yn dioddef o'r afiechyd yn 57 oed.

Eglurodd Mrs Holmes bod gwaith y cynllun yn "amhrisiadwy".

"Mae'n helpu dad i gadw'n iach, i fynd allan ac i gymdeithasu," meddai.

"Dwi wedi fy siomi, dwi wedi siarad efo dad ac mae o wedi ei siomi.

"Roedd o'n edrych ymlaen at ymweliad y cyfaill gwirfoddol.

"Maen nhw'n mynd allan, yn cerdded ac yn chwerthin efo'i gilydd.

"Dydi'r math yma o wasanaeth ddim ar gael yn unlle arall.

"Mae 'na wahaniaeth sylweddol o ran ei gymeriad ers iddo gael y cwmni."

Ychwanegodd Karen Collins, swyddog datblygu gyda Chymdeithas Alzheimer's, y byddai'n drist iawn petai'r prosiect yn dod i ben.

"Rydym mewn cysylltiad â thua 50 o deuluoedd rŵan ac yn rhan allweddol o'u bywydau ac allwn ni ddim cerdded i ffwrdd rŵan.

"Does 'na ddim i'w gynnig yn ei le."

Dywedodd llefarydd ar ran Cronfa Loteri Fawr mai ariannu cynlluniau presennol gydag elfennau newydd y byddan nhw.

"Rydym efallai yn cefnogi nifer o geisiadau sy'n ceisio gweithio mewn ardaloedd daearyddol newydd a fydd yn gweithio gyda grwpiau newydd a phobl newydd er mwyn cynnig gwasanaethau neu weithgareddau newydd sy'n ychwanegu at ein gwaith presennol."