British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Sadwrn, 14 Tachwedd 2009, 10:18 GMT
Casnewydd yn croesawu cerdd dantwyr

Chwarae'r delyn

Bydd Gŵyl Gerdd Dant yn ymweld â Chasnewydd am y tro cyntaf erioed eleni wrth i Gymdeithas Cerdd Dant Cymru ddathlu ei ben-blwydd yn 75 oed.

Mae'r Ŵyl undydd yn cael ei chynnal yn Theatr Glan yr Afon ddydd Sadwrn.

Er bod twf wedi bod yn nifer y corau sy'n cystadlu eleni, mae yna brinder mewn nifer o gystadleuthau eraill.

Mae rhai yn son y gallai cyngerdd sy'n cael ei gynnal yng Nghanolfan y Mileniwm, Caerdydd ar yr un noson fod wedi profi'n ormod o atyniad i rai cantorion.

Ond dywedodd trefnydd Dewi Jones ei fod yn ffyddiog y bydd yr Ŵyl eleni yn fendigedig.

Yr ifanc

"Hawdd iawn ydi sticio i ardaloedd fel Pen Llŷn, Sir Fôn a'r cadarnleoedd.

"Rydan ni yma yng Nghasnewydd ac mae hynny yn wych o beth.

"Ydi mae hi'n anoddach ac yn gyffredinol mae 'na lai yn cystadlu, ond rydan ni yma a da o beth ydi hynny."

Dywedodd un o aelodau Pwyllgor y Gymdeithas, Owain Siôn, bod mwy a mwy o bobl ifanc yn dangos diddordeb.

"Rydym yn dathlu eleni ac mae'n galondid i'r gymdeithas bod cymaint o bobl ifanc yn ymwneud â'r gymdeithas neu a byd cherdd dant ei hun," meddai.

Ond yng Nghanolfan y Mileniwm fe fydd cyngerdd i ddathlu pen-blwydd y ganolfan yn 5 oed, pen-blwydd y cyfansoddwr Karl Jenkins a 10 mlynedd ers Datganoli yng Nghymru.

Dywedodd Huw Foulks, arweinydd Côr Y Waun Ddyfal yng Nghaerdydd, eu bod nhw wedi gorfod pwyso a mesur cystadlu yn yr ŵyl neu gymryd rhan yn y cyngerdd.

"Fe ddaeth y gwahoddiad ym mis Awst i gymryd rhan ac roedd rhaid meddwl pa ddigwyddiad fyddai mwya o fudd i ni fel côr eitha newydd ifanc yng Nghaerdydd.

"Fe wnaethon ni gystadlu dwy flynedd yn ôl yn yr ŵyl felly fe wnaetho ni benderfynu y byddem yn cymryd rhan yn y cyngerdd gan ei fod yn rhywbeth newydd a ffres."

Ychwanegodd trefnydd yr Ŵyl, Dewi Jones, nad oedd yn meddwl y byddai hynny yn amharu llawer ar yr achlysur.

"Mae ganddo ni ein dilynwyr blynyddol a chefnogwyr ac fe fyddwn yn gorffen ar nodyn uchel iawn iawn gan fod 'na wyth o gorau cerdd dant.

"Mi fydd hi'n fendigedig yno dwi'n gwybod."

Fe fydd cystadlu o'r ŵyl i'w glywed ar BBC Radio Cymru am 7pm ac ar S4C am 2.30pm-7pm ac yna o 8.15pm ymlaen ddydd Sadwrn.



CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific