Talu toll â cherdyn: Gam yn nes

Gall system newydd olygu bod gyrwyr yn gallu defnyddio cerdyn i dalu

Mae caniatáu i yrwyr sy'n teithio rhwng de Cymru a Lloegr dalu toll â cherdyn gam yn nes.

Ar hyn o bryd rhaid i yrwyr dalu ag arian parod neu ddyfais electroneg.

Ond mae Llywodraeth San Steffan yn ceisio newid deddf sy'n atal defnyddio cardiau credyd neu ddebyd.

Mae gweithgor wedi sefydlu y bydd modd derbyn cardiau mewn egwyddor.

Dywedodd Asiantaeth y Priffyrdd fod "gwelliannau" wedi cael eu cynnig er mwyn caniatáu defnyddio cardiau yn y tollbyrth.

Mae codi tâl ar y ddwy bont yn rhan o Ddeddf Pont Hafren 1992.

Dywedodd rheolwr cyffredinol Severn River Crossing, Jim Clune, ei fod yn disgwyl y byddai modd derbyn cardiau rywbryd yn 2010.

'Symud ymlaen'

"Rhaid i'r Senedd yn Llundain dderbyn y cynnig a rhaid i'r Ysgrifennydd Gwladol ei gymeradwyo.

"Rydyn ni'n falch ond mae angen gwaith ymarferol yn y tollau, gosod yr offer yn ei le.

"Yn fy marn i, fydd hyn ddim yn digwydd cyn ail hanner y flwyddyn nesaf.

"Ond rydyn ni wedi symud ymlaen ers y llynedd."

Gweithgor: Pa mor ymarferol yw defnyddio cerdyn?

Cafodd gweithgor ei sefydlu ym mis Tachwedd 2007.

Roedd 'na gynrychiolwyr o Asiantaeth y Priffyrdd, Severn River Crossing, Llywodraeth y Cynulliad a Llywodraeth San Steffan.

Fe gafodd yr argymhellion eu cyflwyno i'r asiantaeth ym mis Hydref 2008.

Dywedodd yr asiantaeth y byddai trafododaethau â Severn River Crossing yn parhau.

"Unwaith y bydd y trafod yn dod i ben, yn bennaf am y costau, gallwn ni benderfynu pryd i gyflwyno'r taliadau newydd."

Dywedodd Adrian Tink o gymdeithas yr RAC, fod tollbyrth eraill prif ffyrdd yn derbyn taliadau cardiau.

"Rydyn ni'n croesawu'r cam diweddara gan ei fod yn rhoi mwy o ddewis i'r gyrrwr."