Marw'n sydyn o glefyd y galon

Fe ymwelodd Gareth Thomas â'i deulu y noson cyn iddo farw

Mae ymgyrch i dynnu sylw at y nifer o bobl ifanc sy'n marw'n sydyn o glefyd y galon wedi cael ei lansio.

Dywed ymgyrchwyr bod 12 o bobl ifanc yn marw bob wythnos yn y DU o'r cyflwr yma, cynnydd o 50% ar yr hyn gredwyd yn flaenorol.

Bu farw Gareth, mab 21 oed Anna Thomas, o'r cyflwr ddwy flynedd a hanner yn ôl.

"Mae fel golau'n cael ei ddiffodd - ac wedi cwrdd â theuluoedd eraill, dyna'n union sy'n digwydd," meddai Ms Thomas.

Roedd Gareth, o Lantrisant, yn byw gyda ffrindiau yng Nghaerdydd wedi iddo raddio o Brifysgol Aberystwyth, pan fu farw.

Yn ôl Ms Thomas, sy'n nyrs, roedd ei mab newydd ddychwelyd o daith sgïo pythefnos.

Roedd wedi ei weld deirgwaith yn ystod yr wythnos cyn ei farwolaeth, gan gynnwys y noson flaenorol.

'Hunllef pob rhiant'

"Fe welsom ef ar ganol nos gan iddo alw adre wedi gwylio'r rygbi.

"Fe ffarweliodd a dychwelyd i'w dŷ yng Nghaerdydd yr oedd yn ei rannu gyda ffrindiau a'r noson honno fe gawsom gnoc ar y drws."

Ychwanegodd iddi ddioddef "hunllef pob rhiant, y gnoc ar y drws gan ddau heddwas".

"Roedd yn iach iawn, yn chwarae pêl-droed bob wythnos, ac wedi gwneud hynny ers blynyddoedd."

Fe wnaeth chwaer Gareth, Sian, areithio ar bedwaredd colofn Sgwâr Trafalgar

Mae'r teulu wedi bod yn weithgar gyda'r elusen Cry (Cardiac Risk in the Young), sy'n ymdrin â marwolaeth sydyn o glefyd y galon.

Wrth dalu teyrnged ar wefan Cry, ysgrifennodd Ms Thomas: "Ni fyddwn byth yn dod dros erchylltra'r noson honno ac ond yn gallu dychmygu sut yr oedd hi i ffrindiau Gareth."

Yn ddiweddar fe wnaeth chwaer Gareth, Siân, areithio ar bedwaredd golofn Sgwâr Trafalgar er mwyn codi ymwybyddiaeth o'r cyflwr.

Dywed Cry bod ymwybyddiaeth o farw'n sydyn o glefyd y galon ymysg yr ifanc yn isel yng Nghymru gyda dros hanner y bobl a holwyd heb fod yn ymwybodol o raddfa'r marwolaethau.

Mae'r mudiad am ddatguddio fersiwn maint poster o gerdyn post sydd wedi ei gynhyrchu ganddyn nhw sy'n cynnwys lluniau 12 o bobl ifanc o Gymru gollodd eu bywydau'n sydyn a hynny heb fod neb wedi sylwi bod rhywbeth yn bod ar eu calonnau.

Caiff y poster ei ddadorchuddio mewn seremoni yng ngwesty'r Novotel, Caerdydd.