Ymchwiliad: Gwella gofal maeth

Cyngor sir: Nifer o'r argymhellion wedi'u cyflwyno

Mae mesurau wedi eu cyflwyno yn Sir Benfro fydd yn gwella diogelwch plant ar ôl i ferch gael ei threisio gan fab mabwysiedig ei gwarchodwr.

Fe gafodd y ferch 10 oed "ei cham-drin yn rhywiol yn gyson".

Cafodd y mab ei garcharu yn 2006.

Mae adolygiad i'r achos - ac achos ble y cymerodd llanc 15 oed orddos - wedi dweud bod angen i asiantaethau cefnogi plant "gyd-weithio'n well".

Dywedodd y cyngor sir ei fod wedi buddsoddi'n "sylweddol" mewn gofal maeth.

Mae crynodebau adroddiadau am y ddau achos wedi eu cyhoeddi.

Roedd yr achos cynta'n ymwneud â Phlentyn B, merch 10 oed gafodd ei cham-drin yn rhywiol gan lanc oedd wedi ei fabwysiadu gan warchodwr y ferch.

Roedd hi a'i brawd mewn gofal ar ôl i'w mam ei cham-drin.

Yn 2005 dywedodd y brawd wrth athro ei fod wedi gweld y llanc yn cam-drin ei chwaer yn rhywiol.

O dan glo

Roedd ymchwiliadau'r heddlu a'r gwasanaethau cymdeithasol wedi dangos ei bod hi wedi cael ei cham-drin yn gyson ers pan oedd hi'n chwech oed.

Fe gafodd y llanc ei gyhuddo o dreisio a'i garcharu am leiafswm o chwe blynedd.

Yn ôl yr adolygiad, "doedd 'na ddim tystiolaeth bod unrhyw asiantaeth neu weithiwr proffesiynol yn gwybod" bod y ferch mewn perygl.

Mae'r adroddiad wedi cyflwyno 33 o argymhellion, gan gynnwys gwella hyfforddi gofalwyr maeth a newid sut y maen nhw'n cael eu hasesu.

Roedd yr ail achos yn ymwneud â bachgen 15 oed gymerodd orddos o gyffuriau ym mis Ionawr 2007.

Dioddefodd Plentyn C niwed difrifol a pharhaol.

Alcohol a chyffuriau

Wedi'r ail achos fe gafodd 20 o argymhellion eu cyflwyno, gan gynnwys gwella'r modd y mae asiantaethau'n delio â theuluoedd sy'n bygwth gweithwyr asiantaeth.

Dywedodd y cyngor sir fod nifer o'r argymhellion wedi'u gweithredu.

"Mae hyn wedi arwain at ganlyniadau gwell i'r plant a'r bobl ifanc y mae Cyngor Sir Benfro'n gofalu amdanyn nhw," meddai.

Yn ôl y cyngor, mae mwy o ofalwyr maeth yn golygu bod mwy o ddewis o gartrefi ar gyfer y plant tra bod mwy o gefnogaeth iddyn nhw wedi gwella gan fod llai'n cael ei rhoi yng ngofal un teulu maeth.