'Brethyn glân y defaid mân'

Bydd y cnu yn addurno adeilad ger Y Drenewydd sy'n dyddio nôl i'r 13eg Ganrif

Bydd cnu gwlân 300 o ddefaid Cymreig yn cael ei ddefnyddio i addurno adeilad sy'n dyddio nôl i'r 13eg Ganrif ar gyfer prosiect celf.

Crëwyd y gwaith 'Clad' gan yr artist Steve Messam ar gyfer Galeri Oriel Davies yn Y Drenewydd, Powys.

Cnu defaid lleol, Defaid Mynydd Duon Cymreig a brîd y Kerry Hill, fydd yn cael ei ddefnyddio orchuddio adeilad pren traddodiadol.

Y bwriad yw dathlu treftadaeth ddiwylliannol a diwydiannol yr ardal.

Lleolir y gwaith celf mewn amgylchedd gwledig, a gellir ei weld o'r Drenewydd.

Rwy'n gobeithio annog ymwelwyr i ystyried swyddogaeth amaethyddiaeth, pensaernïaeth ac estheteg leol ar yr amgylchedd cyfarwydd Steve Messam

Dewiswyd Mr Messam o 134 o ymgeiswyr ar gyfer prosiect yn yr arddangosfa a elwir Tu Hwnt i'r Patrwm.

"Rwy'n gobeithio annog ymwelwyr i ystyried swyddogaeth amaethyddiaeth, pensaernïaeth ac estheteg leol ar yr amgylchedd cyfarwydd," meddai.

Bwriad Tu Hwnt i'r Patrwm yw dod ag artistiaid o Gymru a llefydd eraill o'r DU at ei gilydd er mwyn archwilio a dathlu patrwm brethyn.

Amcan yr arddangosfa yw dathlu llwyddiant diwydiant brethyn Y Drenewydd ar hyn o bryd ac yn y gorffennol.

Mae'r galeri wedi comisiynu dau artist arall, Catherine Bertola ac Angharad Pearce-Jones, i gynhyrchu gwaith ar gyfer yr arddangosfa.

Bydd yr arddangosfa Tu Hwnt i'r Patrwm i'w weld yng Ngaleri Oriel Davies o Dachwedd 21 hyd at fis Ionawr, tra bydd Clad i'w weld hyd Ragfyr 6.