Sioe deithiol gwrth-fwlio

Bydd y Daith Parch yn ymweld ag wyth o leoliadau gwahanol

Mae sioe deithiol gwrth-fwlio yn cael ei chynnal ledled Cymru fel rhan o ymgyrch i fynd i'r afael â'r broblem mewn ysgolion.

Bydd y 'Daith Parch' yn anelu at godi ymwybyddiaeth o'r gwahanol fathau o fwlio sy'n cael effaith ar blant a phobl ifanc.

Llywodraeth y Cynulliad a NSPCC Cymru sydd y tu ôl i'r ymgyrch gyda chefnogaeth Rhwydwaith Gwrth-fwlio Cymru.

Yn dechrau ym Mangor ddydd Mawrth, bydd y Daith Parch yn ymweld ag wyth o leoliadau gwahanol.

Bydd yn dod i ben gyda digwyddiad yng Nghasnewydd i nodi'r Wythnos Gwrth-fwlio Genedlaethol a gynhelir rhwng Tachwedd 16 a 20.

Mae'r sioe yn cynnig gweithdai ac yn ymdrin â materion megis seiberfwlio, bwlio homoffobig, a bwlio yn gysylltiedig ag anabledd.

Bydd y cwmni theatr 'Diverse Arts' yn llwyfannu perfformiadau theatr rhyngweithiol, gan roi cyfle i ddisgyblion edrych ar effaith bwlio ar fywydau plant a phobl ifanc.

Dywedodd Jane Hutt, y Gweinidog Addysg:

"Bydd y gweithdai ledled Cymru yn rhoi cyfle rhagorol i godi ymwybyddiaeth o'r materion sy'n gysylltiedig â bwlio, tra'n helpu i roi cymorth a gwybodaeth i'r rhai sy'n cael eu heffeithio".