Prif Gwnstabl newydd wrth y llyw

Mark Polin sy'n olynu Richard Brunstrom

Mae Prif Gwnstabl Heddlu Gogledd Cymru, Mark Polin, wedi dechrau ar ei swydd newydd ddydd Llun.

Yn 46 oed mae'n olynu Richard Brunstrom, gafodd gryn sylw gan y wasg Brydeinig oherwydd ei safiad ar oryrru a chyffuriau.

Bu Mr Polin yn ddirprwy Brif Gwnstabl Heddlu Sir Gaerloyw, a bu'n gweithio am bedair blynedd yn rhengoedd Heddlu Gwent.

Dywedodd ei fod yn awyddus i barhau â'r gwaith da ac 'adeiladu ar record dda' Heddlu'r Gogledd.

Yn ôl Ian Roberts, Cadeirydd Awdurdod Heddlu Gogledd Cymru, bydd Heddlu'r Gogledd yn elwa o brofiad eang ac arbenigaeth Mark Polin.

Cyn-ddirprwy Brif Gwnstabl y Gogledd, Clive Wolfendale, sydd wedi bod wrth y llyw ar ôl i Mr Brunstrom ymddeol ym mis Gorffennaf.