Ymchwiliad Irac: 'Diffyg parch'

Bydd gwrandawiadau cyhoeddus cyntaf yr ymchwiliad yn cael eu cynnal yn Llundain

Mae Aelod Seneddol Plaid Cymru wedi beirniadu'r ymchwiliad i ryfel Irac am fod teuluoedd milwyr o Gymru wedi gorfod teithio i Loegr i roi tystiolaeth.

Dywedodd aelod seneddol Meirionnydd Nant Conwy, Elfyn Llwyd, bod hynny'n dangos "diffyg parch" i rôl milwyr o Gymru.

Bydd gwrandawiadau cyhoeddus cyntaf yr ymchwiliad yn cael eu cynnal yn Llundain fis nesaf.

Mae eraill wedi eu cynnal ym Manceinion a Bryste.

Dywedodd llefarydd ar ran yr ymchwiliad, sy'n cael ei arwain gan Syr John Chilcot, bod y cyfarfodydd wedi eu trefnu "i fod yn gyfleus i'r teuluoedd".

Yn ôl Mr Llwyd: "Mae nifer fawr o filwyr o Gymru wedi mynd i Irac i ymladd mewn rhyfel anghyfreithlon a nawr mae'r ymchwiliad yn dangos diffyg parch iddyn nhw".