Atomfa: Agor storfa

Mae storfa gwastraff niwclear lefel ganolig wedi ei hagor

Mae storfa fydd yn cynnwys gwastraff niwclear lefel ganolig hen orsaf niwclear Trawsfynydd wedi cael ei hagor.

Fe fydd yn cynnwys hyd at 333 o gratiau yn llawn o wastraff yn gymysg â choncrid.

Dywedodd rheolwyr y safle na ddylai pobl leol boeni oherwydd bod digon o fesurau diogelwch.

Ond mae ymgyrchwyr sy'n erbyn gorsafoedd niwclear newydd wedi dweud bod costau dadgomisiynu'n codi.

Dechreuodd y gwaith dadgomisynu yn 1993.

Bydd y gwastraff yn cael ei gadw yno tan i Brydain ddod o hyd i fan canolog lle bydd gwastraff yr holl atomfeydd.

Yr Aelod Cynulliad lleol Arglwydd Elis Thomas agorodd y safle.

Dywedodd ei fod am y tro cynta yn dweud ei fod o blaid ail atomfa ar safle Wylfa B yn Ynys Môn.

Byddai hyn, meddai, yn defnyddio sgiliau technegol sydd eisoes ar gael yn y gogledd orllewin.

Mae ei sylwadau yn groes i bolisi Plaid Cymru.

Yn 2005 dywedodd maniffesto'r blaid eu bod yn erbyn gorsafoedd niwclear am nad oedd "modd diogel o waredu gwastraff gwenwynig iawn."

Mae disgwyl i safle Trawsfynydd gael ei glirio'n llwyr erbyn 2096.