British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 14 Awst 2009, 05:54 GMT 06:54 UK
Gadael y Bala a chodi 1,000

Jason Owen a'i feic yn Stondin Eisteddfod 2010
Bydd yr arian i'w rannu rhwng y pwyllgor trefnu lleol yn Nhredegar ar gyfer Eisteddfod 2010 ac elusen Ymddiriedolaeth Ffibrosis Systig

Mae cynghorydd Annibynnol wedi seiclo o'r Bala i Lyn Ebwy lle bydd yr Eisteddfod y flwyddyn nesaf.

Fe seiclodd Jason Owen 130 milltir o Faes Eisteddfod y Bala i Flaenau Gwent.

Cyrhaeddodd Y Gweithfeydd yng Nglynebwy ar ôl dau ddiwrnod o "seiclo caled".

Cododd £1,000 ar gyfer y pwyllgor trefnu lleol yn Nhredegar ac elusen Ymddiriedolaeth Ffibrosis Systig. Mae ganddo ddau fab â'r cyflwr.

'Profiad gwych'

Seiclodd drwy fynyddoedd Cymru i Lanfair-ym-Muallt ar hyd yr A470 cyn teithio i Grughywel a thros Mynydd Llangynidr i Lyn Ebwy.

Dywedodd ei fod "wedi gwireddu breuddwyd" drwy gyflawni'r daith.

"Gan nad yw'r Eisteddfod wedi bod yn yr ardal hon ers hanner canrif, roedd yn gyfle rhy dda i golli i godi ymwybyddyddiaeth wrth baratoi ar gyfer 2010.

"Aeth yn dda iawn ac roedd yn brofiad gwych. Ges i groeso hyfryd pan gyrhaeddes i'n ôl.

"Hoffwn i ddiolch i bawb am eu dymuniadau da a'u cefnogaeth - ac am fy helpu i godi cymaint o arian."

Dywedodd ei fod wedi mwynhau y golygfeydd arbennig ar hyd y daith.

Ond roedd yn drueni, meddai, y bu'n rhaid iddo golli angladd mam-gu ei bartner oherwydd y daith.

Jason sydd â chyfrifoldeb am hamdden a diwylliant ar Gyngor Sir Blaenau Gwent.

Cefnogaeth

Gwnaeth y rhan gynta o'r daith ar ben ei hun ond dydd Sadwrn roedd 'na lywodraethwyr o Ysgol Gynradd Georgetown, Tredegar, yn gwmni iddo.

Alan, gyrwr y car fydd yn dilyn Jason Owen a Jo Thomas
Jo Thomas o'r cyngor yn dymuno pob lwc i Jason

Roedd wedi arfer beicio "flynyddoedd mawr yn ôl," meddai, ac wedi teithio o'r Rhyl i Lyn Ebwy 14 blynedd yn ôl.

"Mae'r Eisteddfod y flwyddyn nesa yn mynd i gynnig cyfleon arbennig.

"Ges i gyfle i fynd o amgylch y Maes yn Y Bala, ac fe wnaeth argraff arna i.

"Gobeithio y byddwn ni'n gallu gwneud yr un peth y flwyddyn nesa, ond efalle gyda mwy o weithgareddau i blant.

"Bydd yn gyfle gwych i dynnu cymunedau gyda'i gilydd."

Roedd y cyngor, meddai, wedi creu cysylltiadau rhwng ysgolion y sir ag ysgolion ardal Y Bala fydd yn mynd i'r Eisteddfod y flwyddyn nesaf.

"Rydyn ni hefyd wedi creu cysylltiadau ag ysgolion yn ardal Wrecsam lle bydd yr Eisteddfod yn 2011."



EISTEDDFOD MEIRION A'R CYFFINIAU 09


GWEFANNAU



Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific