Cyhoeddi lleoliad Prifwyl 2011

Fe fydd yr Eisteddfod yn cael ei chynnal 'ar adeg gyffrous'

Fe fydd Eisteddfod Genedlaethol 2011 yn cael ei chynnal ar gyrion tref Wrecsam.

Eisoes roedd bwriad i gynnal yr Eisteddfod yn Sir Wrecsam ond dydd Iau fe gafodd union leoliad y Maes ei gadarnhau.

Dywedodd trefnwyr yr Eisteddfod y byddai'r Eisteddfod yn cael ei chynnal ar dir Fferm Lower Bers ar gyrion Wrecsam.

Mae'r lleoliad oddi ar Ffordd Rhuthun ac yn ymyl Ysgol Clywedog.

"Rydym yn dechrau gweddïo o heddiw ymlaen y bydd y trefniadau yn mynd yn eu blaen," meddai Aled Roberts, arweinydd Cyngor Wrecsam.

'Pwyllgor lleol'

"Rydym o'r diwedd wedi setlo ar leoliad sydd mewn lle cyfleus.

"Fe fyddwn ni'n cychwyn y broses o gael pwyllgor lleol at ei gilydd ym mis Medi."

Dywedodd y byddai modd cerdded o'r Maes i ganol tref Wrecsam.

Fe fyddai'r Eisteddfod yn cael ei chynnal, meddai, ar adeg gyffrous.

"Rydym yn ymgynghori oherwydd chweched ysgol Gymraeg y sir fydd yn agor o fewn pythefnos i ddiwedd yr Eisteddfod yn y dref.

'Seithfed ysgol'

"... efallai y byddwn ni erbyn 2011 yn ymgynghori ar y seithfed ysgol.

"Mae'r twf yn y galw am addysg Gymraeg yn hwb i ni yn y sir.

"Gallwn fod erbyn 2011 yn meddwl am ail ysgol uwchradd Gymraeg gan ein bod ni'n ymwybodol y gallai Ysgol Morgan Llwyd fod yn rhy fach.

"Rydym yn edrych ymlaen at yr Eisteddfod ymhen dwy flynedd."