British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 7 Awst 2009, 10:11 GMT 11:11 UK
Gwobr gyfieithu i Catherine

Catherine Lowe a Tudur Jones
Catherine Lowe yn derbyn ei gwobr gan Tudur Jones

Mae cyfieithydd ar ei liwt ei hun wedi derbyn Gwobr Goffa Wil Petherbridge 2009.

Ar Faes yr Eisteddfod y derbyniodd Catherine Lowe o Dregarth ger Bangor ei gwobr.

Cymdeithas Cyfieithwyr Cymru sy'n cyflwyno'r wobr er cof am gyn-ysgrifennydd y mudiad.

Roedd Wil Petherbridge o Gaerdydd yn arloeswr yn y byd cyfieithu.

Dywedodd Catherine: "Fyddwn i ddim wedi breuddwydio sefyll yr un arholiad oni bai i Jane Owen, Cyfieithydd Cyngor Sir Ddinbych, awgrymu y byddai'n dda o beth i mi sefyll arholiad Cymdeithas Cyfieithwyr Cymru gan fod cymhwyster felly'n debyg o ddod yn ofyniad cyffredinol cyn bo hir."

Enillydd y llynedd, Tudur Jones, gyflwynodd y wobr mewn seremoni ar y Maes.

'Llongyfarch'

"Rydym yn llongyfarch Catherine yn wresog ar ei champ," meddai Berwyn Prys Jones, cadeirydd y mudiad.

Berwyn Prys Jones, Catherine Lowe, CatrinPetherbridge, Tudur Jones a Sandra merch Wil Petherbridge
Berwyn Prys Jones, Catherine Lowe, CatrinPetherbridge, Tudur Jones a Sandra merch Wil Petherbridge

"Ar yr un pryd rydyn ni'n cofio'n annwyl iawn am gyfaill a chydweithiwr y bu ei golli'n ergyd drom iawn i ni i gyd."

Daw Catherine o Lanfrothen ger Penrhyndeudraeth.

Ar ôl mynd i Ysgol Ardudwy, Harlech, fe raddiodd yn y Gymraeg ym Mhrifysgol Bangor.

Bu'n gweithio yn y cyfryngau, i'r BBC a chwmnïau annibynnol, cyn troi at gyfieithu dair blynedd yn ôl.

Mae'r wobr yn cael ei chyflwyno i'r un gafodd y marciau uchaf yn arholiadau Aelodaeth Sylfaenol y mymdeithas, cyfieithu i'r Gymraeg, yn ystod y ddwy rownd ym mis Hydref 2008 ac Ebrill 2009.

Fe fydd y chwilio am enillydd 2010 yn dechrau ar Hydref 3 eleni pan fydd Arholiadau Aelodaeth nesaf y mudiad yn Aberystwyth, Caerdydd a Chaernarfon.



EISTEDDFOD MEIRION A'R CYFFINIAU 09


GWEFANNAU



Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific