British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 7 Awst 2009, 11:58 GMT 12:58 UK
Jason yn beicio o'r gogledd i'r de

Jason Owen a'i feic yn Stondin Eisteddfod 2010
Dechreuodd Jason ei daith i Lyn Ebwy o'r Bala fore Gwener

Toc wedi naw fore Gwener fe ddechreuodd Jason Owen daith 130 milltir o Faes yr Eisteddfod yn Y Bala.

Nod cynghorydd annibynnol Georgetown ar Gyngor Sir Blaenau Gwent yw beicio o'r Bala i Lyn Ebwy lle bydd yr Eisteddfod y flwyddyn nesa.

Mae'n codi arian ar gyfer y Brifwyl ac elusen arbennig ac yn gobeithio cyrraedd Glyn Ebwy erbyn 3pm ddydd Sadwrn ar ôl aros dros nos yn Llanfair-ym-Muallt.

Dywedodd ei fod yn edrych ymlaen at y golygfeydd arbennig ar hyd y daith.

Bydd yn mynd i Lanfair-ym-Muallt ar hyd yr A470 cyn teithio i Gurghywel a thros Mynydd Llangynidr i Lyn Ebwy.

"Dwi'n falch taw'r ffordd hon dwi'n gwneud y daith ... fe fyddai wedi bod yn fwy anodd y ffordd arall," meddai cyn dechrau.

Fe sydd â chyfrifoldeb am hamdden a diwylliant ar y cyngor. "Mae'r daith yn cyfuno'r dda," meddai.

Cefnogaeth

Mae'n codi arian ar gyfer yr Eisteddfod ac elusen Ymddiriedolaeth Ffibrosis Systig.

"Dwi ddim yn siwr iawn faint o arian sydd wedi ei gasglu ... dyw nifer fawr o ffurflenni noddi ddim wedi dod yn ôl ond dwi'n siwr y bydd 'na £1,000.

"Dwi'n gwneud y rhan gynta ar ben 'yn hunan ond dydd Sadwrn mae 'na lywodraethwyr o Ysgol Gynradd Georgetown yn Nhredegar yn dod i gefnogi.

Alan, gyrwr y car fydd yn dilyn Jason Owen a Jo Thomas
Jo Thomas o'r cyngor yn dymuno pob lwc i Jason

"Fe fydd y saith awr ddydd Gwener yn hir ac unig."

Roedd wedi arfer beicio "flynyddoedd mawr yn ôl," meddai, ac wedi teithio o'r Rhyl i Lyn Ebwy 14 blynedd yn ôl.

Er ei fod wedi ymarfer y tro hwn dywedodd nad oedd y dasg yn hawdd.

"Mae'r Eisteddfod y flwyddyn nesa yn mynd i gynnig cyfleon arbennig.

"Dwi wedi cael cyfle i fynd o amgylch y Maes yn Y Bala ... gobeithio y byddwn ni'n gallu gwneud yr un peth y flwyddyn nesa."

Roedd y cyngor, meddai, wedi creu cysylltiadau rhwng ysgolion y sir ag ysgolion ardal Y Bala fydd yn mynd i'r Eisteddfod y flwyddyn nesaf.

"Rydym hefyd wedi creu cysylltiadau ag ysgolion yn ardal Wrecsam lle bydd yr Eisteddfod ar ein hôl ni."



EISTEDDFOD MEIRION A'R CYFFINIAU 09


GWEFANNAU



Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific