Hwb o £25m i ganolfan

Y sefydliad: Ymchwil arloesol

Fe fydd gwyddonwyr yng Nghymru yn buddsoddi £25 miliwn mewn canolfan sy'n ymchwilio i effeithiau newid hinsawdd.

Dywedodd Sefydliad y Gwyddorau Biolegol, Amgylcheddol a Gwledig Prifysgol Aberystwyth y byddai'r arian yn codi safonau.

Nod y sefydliad yw creu "canolfan ryngwladol ar gyfer diogelu bwyd, ynni a dŵr".

Roedd y cyhoeddiad yn Y Sioe Fawr yn Llanelwedd.

Dywedodd y sefydliad y byddai'r arian oddi wrth yr Cyngor Ymchwil Biotechnoleg a Gwyddorau Biolegol a Llywodraeth y Cynulliad.

'Arloesol'

"Mae'n addas bod y prif fuddsoddiad yng Ngogerddan (ger Aberystwyth) wrth i ni ddathlu 90 mlynedd o waith ymchwil," meddai cyfarwyddwr y sefydliad, Dr Wayne Powell.

"Mae ein gweledigaeth ni yr un peth, cynnal ymchwil o'r radd flaena er budd ffermio, yr amgylchedd a'r economi a chanolbwyntio ar fwyd, dŵr ac ynni.

"Yn naturiol, mae ein meysydd ymchwil yn ehangach fel rhai arloeswyr 1919.

"Rydyn ni'n ymateb yn wych i heriau'r dydd ac yn defnyddio'n arbenigedd ymchwil i wasanaethu Cymru a gwledydd eraill."