Cwmni i ailystyried cynnig

Dim ond 80 o weithwyr fyddai ar ôl ar y safle petai'r cwmni'n gwrthod y cymorth

Fe fydd perchnogion Aliwminiwm Môn yn ailystyried cynnig gan lywodraethau'r DU a Chymru i achub y ffatri a diogelu swyddi.

Bu gwleidyddion a swyddogion o'r cwmni yn trafod dyfodol y cwmni am dros dair awr a hanner nos Lun.

Fe fydd bwrdd Aliwminiwm Môn yn cyfarfod ddydd Mawrth i drafod cynnig gan Lywodraeth y DU a Llywodraeth y Cynulliad o bron i £50 miliwn.

Mae'r safle yn cyflogi 500 o weithwyr ac eisoes mae 'na gyhoeddiad bod 250 o swyddi i ddiflannu yn ychwanegol at y 140 o ddiswyddiadau gwirfoddol a gyhoeddwyd yn gynharach yn y mis.

Gall cannoedd o swyddi gael eu colli yn y ffatri ym mis Medi oni bai y bydd modd i gwmni Aliwminiwm Môn newid eu meddwl a chau'r ffatri.

Ar hyn o bryd mae'r ffatri yn derbyn cyflenwad trydan yn rhad o orsaf niwclear Yr Wylfa.

Trafod pellach

Ond daw'r cytundeb i ben ym mis Medi a dydi'r cwmni ddim wedi canfod cyflenwr rhad arall.

Fe wnaeth Aliwminiwm Môn wrthod cynnig gan Lywodraeth y DU a Llywodraeth y Cynulliad yn gynharach yn y mis o gymhorthdal o bron i £50 miliwn dros bedair blynedd.

Nos Lun bu Ysgrifennydd Cymru Peter Hain yn rhan o'r trafodaethau gyda'r cwmni i'w perswadio i dderbyn y cynnig.

Fe wnaeth cyfarwyddwyr perchnogion Aliwminiwm Môn, Rio Tinto Alcan and Kaiser Aluminium, gytuno i drafod y cynnig ddydd Mawrth gyda'r bwrdd llawn.

Ond yn ôl ffynhoellau doedd y gweinidog ddim yn ffyddiog.

"Yn ystod y cyfarfod nos Lun fe wnaethom ail adrodd y cynnig o bron i £50 miliwn i ddiogelu 350 o swyddi ar y safle," meddai Mr Hain ar ôl y cyfarfod.

"Fe wnaeth y cwmni dderbyn ei fod yn gynnig hael ac addo ei drafod mewn cyfarfod llawn o fwrdd Aliwminiwm Môn ddydd Mawrth.

"Rydym yn deall y pwysau masnachol sydd 'na ar y cwmni ond yn gobeithio y bydd y bwrdd llawn yn ystyried y cynnig hael a'r ymrwymiad sydd ganddyn nhw i bobl Ynys Môn ar ôl 40 mlynedd o waith cynhyrchu ar yr ynys."

Roedd cynrychiolwyr yr undeb, AS Ynys Môn Albert Owen a gweinidogion Swyddfa Cymru, Wayne David ac Ian Lucas yn bresennol yn y cyfarfod hefyd.