Rhaeadr: Enwi tad a merch

Cafodd yr ardal ei chau ddydd Sul

Mae'r heddlu wedi enwi'r ferch dair oed a'i thad 35 oed fu farw ar ôl syrthio 50 troedfedd i lawr rhaeadr ger Harlech.

Roedd James Scott Gallacher a'i ferch Soraya Alicia Gallacher yn dod o ardal Partington ger Manceinion.

Fe syrthiodd y ddau i lawr rhaeadr Nancol ddydd Sadwrn.

Roedd y teulu yn gwersylla gerllaw.

Cafodd cwest ei agor a'i ohirio i'w marwolaeth ddydd Llun.

Fe gafodd y gwasanaethau brys wybod fod y ddau ar goll yn ardal Llanbedr am 4pm ddydd Sadwrn.

Ar ôl derbyn galwad bod y ddau wedi syrthio i lawr Rhaeadr Nantcol fe chwiliodd hofrennydd, criwiau ambiwlans a dau ddeifiwr amdanyn nhw.

Daethpwyd o hyd i'r cyrff ddwy awr yn ddiweddarach mewn pwll.

Mae'r heddlu a'r awdurdod lleol yn ymchwilio'n llawn ac mae'r Gweithgor Iechyd a Diogelwch wedi cael gwybod.

'Rhywbeth o'i le'

Y ddau ddeifiwr oedd rheolwr Maes Gwersyll Mochras, Richard Workman, a'i gydweithiwr, James Hordley.

"Mi welon ni'r hofrennydd uwchben y rhaeadr ac felly mi oedden ni'n gwybod bod rhywbeth o'i le," meddai Mr Workman.

"Mi gynigiodd y ddau ohonon ni helpu chwilio am y ddau a chytunodd yr heddlu.

"Mae'n rhaid ein bod ni yn y dŵr am awr."

Dywedodd Mr Hordley: "Y cyfan yr oeddwn i'n meddwl amdano oedd dod o hyd i'r ferch a mynd â hi'n ôl yn saff."

'Peryglon'

Dywedodd Alan Edwards, rheolwr diogelwch cymunedol y gwasanaeth tân: "Cafodd y ddau gorff eu darganfod mewn pwll am 5.56pm nos Sadwrn.

"Mae'r drychineb yn dangos beth yw peryglon nofio mewn mannau sy ddim yn gyfarwydd i bobl.

"Dylai pawb fod yn fwy gofalus nag arfer wrth fentro i'r dŵr neu wrth ymyl dŵr."