Rhedwr yn marw yn Ras yr Wyddfa

Yr enillydd: Andi Jones o Loegr

Fe lwyddodd yr heddlu, yr Awyrlu a Thîm Achub Mynydd Llanberis i achub pedwar o redwyr Ras yr Wyddfa ddydd Sadwrn.

Ond fe gyhoeddwyd bod un yn farw yn Ysbyty Gwynedd, Bangor.

Y gred yw ei fod yn 45 oed ac o Wynedd.

Dywedodd yr Arolygydd Ian Maxwell y dylai pawb ar y mynydd fod "yn fwy gofalus" a sirchau bod ganddyn nhw'r cyfarpar iawn.

'Heb eu hail'

"Mi ddylen nhw rhoi gwybod i rywun lle maen nhw'n bwriadu cerdded - a bod yn ddigon profiadol i ddelio â'r hyn sy'n digwydd ar y mynydd."

Dywedodd cadeirydd Tîm Achub Mynydd Llanberis, Elfyn Jones, fod trefniadau diogelwch y ras "heb eu hail".

"Mi aeth yn anymwybodol ger Clogwyn ... ond mi gafodd driniaeth o fewn eiliadau cyn mynd ar frys mewn hofrennydd i'r ysbyty."

Roedd 500 yn y ras ddechreuodd yn 1975.

Yr enillydd am y bedwaredd flwyddyn o'r bron oedd Andi Jones o Loegr - 10 milltir mewn 1 awr 8 munud.