Ysgol: Mesurau arbennig

Roedd Estyn wedi cynnal arolwg yn Ysgol y Parc yn gynt yn y flwyddyn

Mae corff arolygu wedi penderfynu cyflwyno mesurau arbennig mewn ysgol.

Roedd Estyn wedi cynnal arolwg yn Ysgol y Parc yng Nghaergybi, Ynys Môn, yn gynt yn y flwyddyn.

Mae'r adroddiad, gafodd ei gyhoeddi ddydd Iau, wedi dweud: "Dyw'r ysgol ddim yn datblygu fel y dylai ... oherwydd tyndra a diffyg cydweithio ..."

Ond mae hefyd wedi dweud bod nodweddion da'r ysgol yn gryfach na gwendidau o ran cyraeddiadau'r plant.

Dywedodd y llywodraethwyr eu bod yn siomedig.

"Rydan ni'n derbyn fod yr ysgol yn wynebu her sylweddol ond yn benderfynol o weithredu'r argymhellion efo help yr awdurdod addysg."

Maen nhw wedi dweud bod yr ysgol wedi wynebu "ychydig o flynyddoedd anodd" oherwydd y bygythiad o gau.

'Siomedig'

Erbyn hyn, mae'r llywodraethwyr wedi paratoi cynllun gweithredu.

Dywedodd llefarydd ar ran y cyngor sir: "Yn naturiol, mae'r awdurdod addysg yn siomedig.

"Ond mae wedi rhoi gwybod i'r corff llywodraethol y bydd yn rhoi digon o gefnogaeth fel bod modd rhoi'r cynllun gweithredu ar waith o fewn misoedd.

"Rydan ni'n sicr y bydd cydweithio'n golygu y bydd safonau'n gwella ..."