Aliwminiwm: 250 i golli gwaith

Y cwmni: Un o gyflogwyr mwya'r gogledd

Mae cwmni Aliwminiwm Môn wedi cyhoeddi fod 250 o swyddi yn diflannu.

Mae hynny'n ychwanegol at y 140 o ddiswyddiadau gwirfoddol gafodd eu cyhoeddi'r wythnos diwethaf.

Roedd y safle yng Nghaergybi yn cyflogi bron 500.

Dywedodd y cwmni fod y diswyddiadau oherwydd "methiant y safle" i ddod o hyd i gytundeb fyddai'n sicrhau cyflenwad o drydan rhad.

Mae cytundeb y cwmni â Gorsaf Bŵer Niwclear Yr Wylfa i gael trydan rhad yn dod i ben ym mis Medi.

Newyddion trist

Yn ôl amserlen y cwmni, bydd cynhyrchu alwminiwm yn dod i ben erbyn mis Medi.

Dywedodd Bob Parry, dirprwy arweinydd Cyngor Môn, fod y cyhoeddiad yn newyddion trist iawn.

"Mim oeddwn i'n amau fod 'na rywbeth ar y ffordd oherwydd bod y diswyddiadau wedi bod o'r blaen ac mi oeddwn i'n amau y buasai 'na 'chwaneg.

"Rhaid i mi fod yn berffaith onest, dwi'n meddwl mai rhoi esgus ydi'r trydan yma.

"Maen nhw wedi cael cynnig sylweddol gan y llywodraeth ac os nad oedden nhw'n fodlon derbyn y cynnig, roeddan ni'n gwybod beth oedd eu bwriad ...

"Ac mae'n amlwg eu bod nhw am adael y safle.

"Mae'r penderfyniad yna wedi ei wneud yn rhan arall o'r byd ac nid ar Ynys Môn."

£50 miliwn

Mae llythyrau eisoes wedi eu hanfon at y gweithwyr yn eu hysbysu o'r bwriad i ddiswyddo 250.

Byddai hynny'n golygu y byddai 80 o bobl yn parhau i weithio ar y safle ail doddi metalau.

Dywedodd llefarydd fod ymdrechion ar y gweill i geisio cadw rhannau eraill o'r gwaith, gan gynnwys ail doddi metalau, ar y safle.

Ddechrau Gorffennaf fe wnaeth Aliwminiwm Môn wrthod pecyn cymorth £50 miliwn oddi wrth Lywodraeth y Cynulliad a Llywodraeth Prydain.

Bydd cynrychiolwyr y cwmni yn cwrdd â gwleidyddion yn Llundain ddydd Llun i gynnal trafodaethau pellach ar y pecyn cymorth.

Maen nhw'n gobeithio y bydd modd dod o hyd i arian ychwanegol ac y bydd modd atal y diswyddiadau diweddara.