Dyn yn syrthio drwy bedwar llawr

Y warws yn Abertawe ydi'r mwya sydd gan y cwmni yn y DU

Mae dyn wedi cael ei gludo i'r ysbyty ar ôl syrthio drwy bedwar llawr yn warws mwya'r cwmni gwe Amazon yn Abertawe.

Cafodd Gwasanaeth Tân ac Achub Canolbarth a Gorllewin Cymru eu galw i'r safle ar Ffordd Fabian toc wedi 12.30pm ddydd Mercher.

Cafodd y dyn, a oedd yn gontractwr yn y warws, ei gludo i Ysbyty Treforys yn Abertawe.

Does 'na ddim manylion pellach am ei gyflwr ond dywedodd y gwasanaeth ambiwlans nad oedd ei anafiadau yn rhai difrifol.

Dywedodd Heddlu De Cymru bod y Gweithgor Iechyd a Diogelwch wedi cael eu hysbysu ac maen nhw'n cynnal ymchwiliad.

Fe agorodd y warws ym mis Ebrill 2008 ac mae'r un maint â 10 cae pêl-droed.

Dyma un o bedair canolfan ddosbarthu a'r mwya gan y cwmni yn y DU.