Davies i ymladd Blaenau Gwent

Alun Davies fydd yr ymgeisydd Llafur ar gyfer etholiadau'r Cynulliad

Mae'r AC Alun Davies wedi ei ddewis gan Lafur i ymladd sedd Blaenau Gwent ar gyfer y Cynulliad Cenedlaethol yn 2011.

Yn etholiad 2007 roedd gan yr aelod Annibynnol Trish Law fwyafrif o 5,357 dros yr ymgeisydd Llafur.

Ar hyn o bryd mae Mr Davies yn AC Canolbarth a Gorllewin Cymru.

Ymhlith y rhai oedd yn ymgeisio am yr enwebiad llafur oedd y cyn weinidog Alun Pugh.

Dywedodd Mr Davies, sy'n enedigol o Dredegar, ei fod yn falch o ennill yr enwebiad.

"Nawr yw'r amser i Lafur Cymru ymladd yn ôl ym Mlaenau Gwent.

"Mae gennym stori dda i'w hadrodd a byddaf yn arwain ymgyrch bositif wedi ei seilio ar y budd o gael AC Llafur i gymunedau a busnesau Blaenau Gwent."

Fe wnaeth Mrs Law ddal ei gafael ar sedd etholaeth Blaenau Gwent yn etholiadau 2007 ar ôl ennill y sedd mewn isetholiad ar ôl marwolaeth ei gŵr Peter Law yn 2006.

Llwyddodd i gynyddu'r mwyafrif gyda 54% o'r bleidlais yn yr etholaeth a fu unwaith yn sedd fwyaf diogel Llafur yng Nghymru.

Aelod annibynnol, Dai Davies, sydd hefyd yn cynrychioli'r sedd yn Nhŷ'r Cyffredin.