Cylchgrawn i dynnu Sylw?

Mae cystadleuaeth agored am gefnogaeth bob tair blynedd gan Gyngor Llyfrau Cymru

Bydd rhifyn enghreifftiol o gylchgrawn Cymraeg newydd yn cael ei gyhoeddi ddydd Mercher.

Cafodd Gwasg y Lolfa £5,000 i baratoi un rhifyn o gylchgrawn Sylw ar ôl i Gyngor Llyfrau Cymru roi grant blwyddyn i gylchgrawn Barn yn hytrach na'r tair blynedd arferol.

Un misolyn ym maes materion cyfoes fydd yn cael cynnig grant gan y Cyngor Llyfrau maes o law.

Mae 3,000 o gopïau o'r cylchgrawn materion cyfoes Sylw wedi eu hargraffu.

'Awdurdodol'

Dywedodd golygydd Sylw, Gwyn Jenkins: "Ein nod oedd creu cylchgrawn fyddai'n apelio at gynulleidfa'r unfed ganrif ar hugain.

"Cylchgrawn awdurdodol gyda diwyg proffesiynol, a lles Cymru yn brif agenda."

CYHOEDDIADAU Golwg - £ 73,000 Y Cymro * - £ 18,000 Barn / Sylw- £ 80,000 (£5,000 o gyllideb 2008/09) Taliesin - £30,000 Barddas - £24,000 Tu Chwith - £6,000 Y Traethodydd - £8,000 Cristion - £ 4,800Gair y Dydd - £2,400 Wcw - £ 36,000 Cip - £ 26,000 Y Selar * - £ 12,000 Lingo Newydd - £18,000 Y Wawr - £10,000 Llafar Gwlad - £7,000 Fferm a Thyddyn - £2,000 Y Casglwr - £1,500 Y Papur Gwyrdd **- £1,000 Cefnogaeth am 3 blynedd oni nodir yn wahanol * Cefnogaeth am flwyddyn ** Grant Datblygu Cyfanswm - £359,700

Mr Jenkins, a arferai weithio yn y Llyfrgell Genedlaethol yn Aberystwyth, yw awdur Prif Weinidog Answyddogol Cymru, y cofiant i Huw T Edwards a gyhoeddwyd yn 2007.

Mae rhifyn dwbl 100 tudalen o Barn sy'n cael ei olygu gan Vaughan Hughes a Menna Baines hefyd newydd gyrraedd y siopau.

Ym mis Tachwedd fe wnaeth Gyngor Llyfrau Cymru gyhoeddi grantiau gwerth £359,700 i helpu cyhoeddi 18 o gylchgronau Cymraeg yn ystod 2009/10.

Ynghylch Barn a Sylw dywedodd Cadeirydd y Panel Grantiau, Gareth Davies Jones, ym mis Tachwedd: "Gyda dau gais cryf yn cystadlu â'i gilydd, barn unfrydol y panel oedd bod rhaid pwyso a mesur y deunydd gorffenedig yn achos y naill gylchgrawn a'r llall a dod i benderfyniad ar ddiwedd proses drylwyr a amlinellir yn y llythyrau cynnig i'r ddau gyhoeddwr.

"Fel rhan o'r broses, bwriedir cael adborth gan ddarllenwyr a defnyddwyr.

"Ar ddiwedd y broses hon, cynigir grant i un misolyn ym maes materion cyfoes."

Mae cystadleuaeth agored am gefnogaeth bob tair blynedd gan y cyngor.