Camddefnyddio: Heddlu'n cyfaddef

Cafodd yr heddlu orchymyn i ryddhau'r wybodaeth

Mae enghreifftiau o staff yr heddlu'n camddefnyddio gwybodaeth wedi dod i'r amlwg oherwydd ymchwiliad BBC Cymru.

Yn wreiddiol, roedd Heddlu'r De wedi gwrthod cais y BBC o dan y Ddeddf Ryddid Gwybodaeth ynglyn ag achosion o'r fath ac achosion o wybodaeth gyfrinachol yn mynd ar goll.

Maen nhw nawr yn dweud fod camddefnyddio gwybodaeth wedi digwydd 10 o weithiau dros gyfnod o dair blynedd.

Cafodd yr heddlu orchymyn i ryddhau'r wybodaeth wedi i BBC Cymru apelio i Swyddfa'r Comisiynydd Gwybodaeth.

Mae'r achosion yn cynnwys dau achos llys yn ymwneud ag aelodau o staff Heddlu'r De oedd wedi pledio'n euog i dorri'r Ddeddf Gwarchod Gwybodaeth.

Roedd y ddau wedi defnyddio systemau cyfrifiadurol heb ganiatâd.

Yn euog

Cafodd aelod staff ei erlyn am ddefnyddio "gwybodaeth am gyndroseddau" a "gwybodaeth yr oedd yr heddlu wedi ei chasglu".

Fe blediodd y person yn euog i dri chyhuddiad cyn cael ei ryddhau'n ddi-amod.

Ymddiswyddodd o'r heddlu wedi'r achos.

Mewn achos arall fe ymddiswyddodd gweithiwr wedi i lys ei gael yn euog o ddefnyddio gwybodaeth heb ganiatâd ar bedwar achlysur.

Ymddiswyddo

Fe wnaeth trydydd aelod o staff ymddiswyddo cyn i wrandawiad mewnol gael ei gynnal.

Roedd yn wynebu cyhuddiad o gasglu gwybodaeth bersonol am berson "anaddas".

Fe wnaeth achosion eraill arwain at rybudd ffurfiol neu rybudd ysgrifenedig.

Gofynodd BBC Cymru i bedwar o heddluoedd Cymru am fanylion 14 mis yn ôl.

Heddlu'r De oedd yr unig un i wrthod gan ddweud y byddai'n costio gormod i ddarparu'r wybodaeth.

2,300

Wrth ddatgelu eu manylion nhw, dywedodd Heddlu Gwent fod disg wedi ei cholli oedd yn cynnwys enwau 2,300 o ddioddefwyr.

Soniodd Dyfed Powys a Heddlu'r Gogledd am achosion o staff yn cael gafael ar fanylion personol pobl ar gyfrifiaduron yr heddlu.

Dywedodd yr Uwcharolygydd Gary Osborne o Heddlu'r De: "Mae pob aelod staff yn cael gwybod beth yw'r canllawiau.

"Pan gawson ni wybod am gamddefnydd fe wnaethon ni ymateb yn briodol.

"Mae yna achosion gerbron llysoedd ar hyn o bryd, nifer wedi dod i'r amlwg oherwydd goruchwyliaeth Heddlu'r De.

"Gallaf sicrhau'r cyhoedd fod digwyddiadau o'r fath yn brin a bod y mwyafrif o'n staff yn dilyn y canllawiau."