Damwain: Enwi menyw fu farw

Roedd y car Audi gwyn wedi gadael y ffordd toc wedi 11pm

Mae Heddlu Dyfed Powys wedi enwi'r fenyw 23 oed fu farw mewn damwain yn Ystradgynlais nos Sadwrn.

Roedd Lowri Evans, oedd yn dod o Ynys Uchaf ger Ystradgynlais, yn teithio yn y car wnaeth daro yn erbyn coeden.

Cafodd gyrrwr 24 oed y car ei arestio.

Bu'n rhaid i'r gwasanaeth tân ryddhau'r fenyw o'r car gyferbyn â chyffordd Caerlan ger gorsaf bysiau Veola yn y dref.

Dywedodd Heddlu Dyfed Powys bod y car Audi gwyn wedi gadael y ffordd ar yr A4067 toc wedi 11pm.

Cafodd dau deithiwr arall oedd yn y car anafiadau i'w gwddf ac fe gawson nhw driniaeth yn Ysbyty Treforys, Abertawe.