Y Lludw: '£20m o hwb'

Bu tua 100,000 o gefnogwyr yn y ddinas yn ystod y prawf

Mae 'na amcangyfrif fod y prawf cyntaf yng Nghyfres y Lludw wedi golygu mwy na £20 miliwn i'r economi leol.

Bu 100,000 o gefnogwyr yng Nghaerdydd yn ystod y prawf pum niwrnod yng Ngerddi Sophia wrth i'r prawf gael ei gynnal yng Nghymru am y tro cyntaf.

Roedd 40 miliwn o bobl yn gwylio'r gêm yn fyw ar y teledu a hyd at 100 miliwn yn gwylio'r uchafbwyntiau.

Hwn oedd y tro cyntaf i unrhyw gêm yn y gyfres gael ei chynnal y tu allan i Loegr ac Awstralia.

'Yn fwy eang'

Dywedodd David Russ, rheolwr gyfarwyddwr Siambr Fasnach De Cymru: "Rydyn ni'n amcangyfri y gallai'r prawf fod wedi dod â mwy nag £20m i'r ardal.

"Bu'n gyfle gwych i farchnata'r ddinas yn fwy eang."

Yn ôl y Prif Weinidog, Rhodri Morgan: "Roedd diweddglo'r gêm yn ffordd addas o sicrhau bod y gêm ei hun gystal â'r cyfleusterau gwych yn Stadiwm Swalec ac yn yr ardal."

'Elwa'n fawr'

Dywedodd Ysgrifennydd Cymru, Peter Hain, fod y prawf cynta'n "hwb" i economi'r ardal.

"Mae nifer o brif ddigwyddiadau chwaraeon wedi cael eu cynnal yng Nghaerdydd ers 10 mlynedd - o Gwpan Rygbi'r Byd i gemau rownd derfynol Cwpan yr FA.

"Ond hwn oedd y tro cyntaf i gêm brawf criced gael ei chynnal yma.

"Gan fod 16,000 bob dydd yn y stadiwm mae'r rhan hon o Gymru wedi elwa'n fawr ar y Lludw.

"Ac mae wedi dangos i weddill y byd ba mor wych yw Caerdydd ..."