Ffliw: Dau achos newydd

Mae swyddogion yn trin y ffliw bellach yn hytrach na cheisio ei arafu

Mae 'na 64 achos o'r ffliw moch wedi cael eu cadarnhau yng Nghymru gyda dau achos newydd.

Mae 9,722 o achosion wedi eu cadarnhau yn y DU erbyn hyn ac 15 person wedi marw, 2 yn Yr Alban ac 13 yn Lloegr.

Caiff achos dynes 45 oed o Bowys ei gysylltu ar ôl teithio i Sbaen.

Mae hi'n gwella yn yr ysbyty.

Ac mae salwch dynes 28 oed o Gaerdydd hefyd yn cael ei gysylltu gyda thaith i Sbaen.

Mae hi wedi cael cynnig triniaeth gwrthfiotig ac yn gwella.

Mae saith o bobl wedi cael triniaeth ysbyty yng Nghymru ac mae pump wedi cael eu rhyddhau.

BETH I'W WNEUD? Os yw unrhyw un yn diodde o symptomau'r ffliw fe ddylai aros gartre Angen edrych ar wefan Galw Iechyd Cymru neu eu ffonio i gadarnhau symptomau - ac os ydyn nhw'n dal yn ansicr, cysylltu ar y ffôn gyda'r meddyg teulu Ddylai neb fynd i'r feddygfa na'r uned damweiniau brys Cariwch hancesi papur gyda chi drwy'r amser Defnyddiwch hancesi glân i guddio'ch ceg a'ch trwyn pan ydych chi'n peswch ac yn tisian Taflwch yr hancesi i'r bin ar ôl eu defnyddio unwaith Golchwch eich dwylo â sebon a dŵr poeth neu â hylif diheintio, yn aml Llinell ffôn Gwybodaeth Ffliw'r Moch: 0800 1 513 513 neu wasanaeth Galw Iechyd Cymru: 0845 46 47

Ledled y byd mae achosion mewn 135 o wledydd.

Mae Prif Swyddog Meddygol Cymru, Dr Tony Jewell, wedi dweud bod "cynlluniau cadarn" yn barod.

"Y cyngor gwyddonol yw y bydd 'na gynnydd yn y nifer o achosion yng Nghymru, yr Alban a Lloegr.

"Rydym yn ei drin yn hytrach na'i arafu rhag lledu ac yn dibynnu ar symptomau clinigol yn hytrach na phrofion labordy i gadarnhau achosion."

Dywedodd Dr Jewell y dylai rhai sy'n diodde o'r ffliw aros gartref a chadarnhau'r symptomau gyda gwasanaeth Galw Iechyd Cymru y symptomau.

"Ddyle nhw ddim mynd i'r feddygfa na'r adran frys rhag ofn iddyn nhw ledu'r ffliw," meddai.

"Mae tystiolaeth hyd yma yn awgrymu mai mân symptomau y mae pobl yn eu diodde a'u bod yn gwella o fewn hyd at saith niwrnod."