Dirwy i gwmni am anaf bachgen

Caewyd Splashland yn dilyn y digwyddiad

Cafodd cwmni gwyliau ddirwy o £150,000 ar ôl i fachgen gael anafiadau difrifol iawn mewn pwll nofio.

Roedd Chad Mole, 7 oed, ar wyliau gyda'i deulu ym maes carafannau Trecco Bay ym Mhorthcawl pan gafodd yr anafiadau ar Hydref 18, 2005.

Cafodd Upper Bay Limited, perchnogion y maes carafannau sydd ymhlith y mwyaf yn Ewrop, orchymyn hefyd i dalu £182,500 o gostau.

Y mis diwethaf, fe gafodd rheithgor y cwmni'n euog o beidio sicrhau nad oedd y bachgen yn agored i risg i'w iechyd a diogelwch.

Roedd y cwmni wedi gwadu'r cyhuddiad mewn dau achos yn Llys Y Goron Caerdydd - doedd y rheithgor cyntaf ddim wedi llwyddo i gytuno ar benderfyniad.

Dywedodd llefarydd ar ran Upper Bay Limited fod y cwmni yn bwriadu apelio yn erbyn y rheithfarn.