Ewrop: 'Carreg filltir i'r iaith'

Dyw'r iaith ddim yn iaith swyddogol yn Ewrop

Mae modd cyfathrebu â'r Comisiwn Ewropeaidd drwy gyfrwng y Gymraeg o ddydd Iau ymlaen.

Bu Plaid Cymru'n ymgyrchu i sicrhau gwell statws i'r iaith ar lefel Ewropeaidd.

Mae'r datblygiad yn cael ei nodi'n swyddogol ym Mrwsel ddydd Iau.

Ond nid yw'r Gymraeg yn cael ei hychwanegu at restr 23 o ieithoedd swyddogol yr Undeb Ewropeaidd.

Yn unol ag ymrwymiadau Cymru'n Un, mae Llywodraeth y Cynulliad wedi bod yn trafod â Llywodraeth San Steffan gyfres o gytundebau sy'n hwyluso'r defnydd o'r iaith yn sefydliadau'r Undeb Ewropeaidd.

Mae'r datblygiad diweddara'n golygu y gall unigolyn sgrifennu at y comisiwn yn Gymraeg a chael ateb yn Gymraeg.

'Cam synhwyrol'

Dywedodd Rhodri Morgan, Prif Weinidog Cymru: "Mae hwn yn gam synhwyrol arall at wneud yr Undeb Ewropeaidd ychydig yn haws i grŵp o'i ddinasyddion ymwneud â hi.

"Wrth wneud hyn, mae'r undeb yn dangos amrywiaeth ddiwylliannol Ewrop ..."

Yn ôl Glenys Kinnock, Gweinidog Ewrop Llywodraeth San Steffan: "Fel un sy'n siarad Cymraeg fy hun, rydw i'n amlwg wrth fy modd i weld bod yr iaith yn cael mwy o gydnabyddiaeth ar y lefel Ewropeaidd.

"Mae hyn dangos ymrwymiad clir yr undeb i hyrwyddo ei dreftadaeth diwylliannol amrywiol."

Syr Kim Darroch, Cynrychiolydd Parhaol San Steffan i'r Undeb Ewropeaidd, a Catherine Day, Ysgrifennydd Cyffredinol y Comisiwn Ewropeaidd, sy'n llofnodi'r cytundeb ddydd Iau.