60 achos o'r ffliw yng Nghymru

Mae swyddogion yn trin y ffliw bellach yn hytrach na cheisio ei arafu

Mae nifer achosion ffliw moch yng Nghymru wedi codi i 60.

Cafodd dyn 66 oed o Gasnewydd ei anfon i'r ysbyty ar ôl taith i Seland Newydd.

Mae'n cael triniaeth wrth-fiotig ac yn gwella ond mae ganddo broblemau iechyd eraill.

Cafodd menyw 56 oed o Gaerdydd ei hanfon i'r ysbyty ar ôl teithio o Sbaen.

Mae hi'n gwella ar ôl cael triniaeth wrth-fiotig.

Ac mae nifer achosion clinigol posib yng Nghymru yn dal i fod yn 28.

Mae Cyngor Rhondda Cynon Taf wedi cyhoeddi eu bod nhw'n gwybod am 10 achos o'r ffliw yn y sir.

Yn yr achosion hyn, meddygon teulu neu Galw Iechyd Cymru sydd wedi gwneud y diagnosis.

Disgyblion

Ymhlith yr achosion mae pedwar disgybl o Ysgol Cardinal Newman, Rhydyfelin ger Pontypridd, dau yn Ysgol Gynradd Pont-y-clun, un yn Ysgol Gynradd Pen-y-graig, un yn Ysgol Babyddol Ioan Sant yn Aberdâr a disgybl yn Ysgol Parc Lewis yn Nherfforest.

Mae menyw 75 oed yn diodde ar ôl dod i gysylltiad ag achos yng Nghaerwysg.

Hyd yn hyn mae pedwar wedi cael triniaeth ysbyty oherwydd y ffliw moch yng Nghymru a dau wedi cael eu rhyddhau.

Mae 'na 1,377 o achosion wedi bod yn yr Alban, 6,162 yn Lloegr a 45 yng Ngogledd Iwerddon.

BETH I'W WNEUD? Os yw unrhyw un yn diodde o symptomau'r ffliw fe ddylai aros gartre Angen edrych ar wefan Galw Iechyd Cymru neu eu ffonio i gadarnhau symptomau - ac os ydyn nhw'n dal yn ansicr, cysylltu ar y ffôn gyda'r meddyg teulu Ddylai neb fynd i'r feddygfa na'r uned damweiniau brys Cariwch hancesi papur gyda chi drwy'r amser Defnyddiwch hancesi glân i guddio'ch ceg a'ch trwyn pan ydych chi'n peswch ac yn tisian Taflwch yr hancesi i'r bin ar ôl eu defnyddio unwaith Golchwch eich dwylo â sebon a dwr poeth neu â hylif diheintio, yn aml Llinell ffôn Gwybodaeth Ffliw'r Moch: 0800 1 513 513 neu wasanaeth Galw Iechyd Cymru: 0845 46 47

Mae 'na saith o bobl wedi marw oherwydd y ffliw a ledled y byd mae achosion mewn 135 o wledydd.

Mae Prif Swyddog Meddygol Cymru, Dr Tony Jewell, wedi dweud bod "cynlluniau cadarn" yn barod.

"Y cyngor gwyddonol yw y bydd 'na gynnydd yn y nifer o achosion yng Nghymru, yr Alban a Lloegr.

"Rydym yn ei drin yn hytrach na'i arafu rhag lledu ac yn dibynnu ar symptomau clinigol yn hytrach na phrofion labordy i gadarnhau achosion."

Dywedodd Dr Jewell y dylai rhai sy'n diodde o'r ffliw aros gartref a tsiecio'r symptomau gyda gwasanaeth Galw Iechyd Cymru y symptomau.

"Ddyle nhw ddim mynd i'r feddygfa na'r adran frys rhag ofn iddyn nhw ledu'r ffliw," meddai.

"Mae tystiolaeth hyd yma yn awgrymu mai mân symptomau y mae pobl yn eu diodde a'u bod yn gwella o fewn hyd at saith diwrnod."