British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Mercher, 8 Gorffennaf 2009, 12:17 GMT 13:17 UK
Prifysgol: Colli 50 o staff?

Prifysgol Llanbedr Pont Steffan
Prifysgol: Prinder o £2m

Mae Prifysgol Llanbedr Pont Steffan wedi cyhoeddi cynllun ar gyfer diswyddo staff er mwyn diogelu dyfodol y sefydliad.

Dywedodd y brifysgol y byddai'r diswyddiadau yn cyfateb i 46 o swyddi llawn amser.

Fe fydd y swyddi, meddai, yn yr adrannau academaidd ac adrannau eraill.

Mae'r brifysgol wedi dweud nad ydyn nhw'n derbyn digon o arian oddi wrth y Cyngor Cyllido Addysg Uwch.

Dywedodd swyddogion eu bod yn wynebu prinder o £2 miliwn ar gyfer 2009-10.

Yr unig ateb, medden nhw, yw lleihau costau cyflogi.

Mae hon yn ergyd mewn ardal sy'n brin o swyddi cyflogau uchel ond mae swyddogion wedi dweud bod angen "penderfyniadau anodd" er mwyn cadw cymaint o swyddi yn yr hir-dymor.

'Dulliau eraill'

Bore Mercher mae cyfarfodydd gyda'r staff a'r undeb wedi bod ac mae ymgynghori am 90 niwrnod wedi dechrau.

Mae'r brifysgol yn cyflogi dros 300 o staff.

Fe gafodd y brifysgol £1.2 miliwn yn llai oddi wrth y cyngor cyllido.

"Mae'r brifysgol wedi ystyried dulliau eraill o gynyddu incwm a lleihau costau," meddai datganiad.

"Ac mae'r rhain yn cynnwys hybu myfyrwyr a defnyddio llety myfyrwyr sy'n eiddo i'r brifysgol a lleihau gwario dianghenraid."

Dywedodd fod costau staff yn 66% gwariant y brifysgol.

Roedd angen delio â'r problemau, meddai, er mwyn sicrhau dyfodol y sefydlaid newydd, Prifysgol Cymru Y Drindod Dewi Sant.

"Mae maint y prinder arian yn golygu bod rhaid gwneud newidiadau mawr sydd, yn anffodus, yn golygu lleihau nifer y staff," meddai Dr Medwin Hughes, is-ganghellor y brifysgol.

"Os na wnawn ni hyn nawr, mae'n bosib y bydd rhaid colli mwy o swyddi neu golli'r brifysgol yn llwyr.

"Rhaid i ni sicrhau bod y brifysgol yn llwyddo'n ariannol."

Cafodd Prifysgol Llanbedr Pont Steffan ei sefydlu yn 1822.

Hwn yw'r sefydliad hyna o ran cyflwyno graddau yng Nghymru ac yn un o brifysgolion lleiaf Ewrop.

Yn Llambed mae 9,000 o fyfyrwyr.



HEFYD
Prifysgol: 'Dim byd terfynol'
28 Awst 08 |  Newyddion
Prifysgol: Poeni am ddiswyddo
28 Awst 08 |  Newyddion
Cyhoeddi enw prifysgol newydd
16 Ebr 09 |  Newyddion
Coleg yn derbyn statws newydd
23 Chwef 09 |  Newyddion
Dau goleg: Bwriad i uno
11 Rhag 08 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific