Mam a merch yn cyrraedd y brig

Fe ddaeth her Abi a Ali Newbould i ben ar Yr Wyddfa

Mae mam a merch wedi dringo'r copa ucha ym mhob sir yng Nghymru mewn pedwar diwrnod.

Roedd hyn yn amrywio o fynydd 137 medr (449 troedfedd) o uchder ym Mro Morgannwg i gopa'r Wyddfa sy'n 1,085 medr (3,560 troedfedd) o uchder.

Ac roedd Ali Newbould, 50 oed, ac Abi, 17 oed, o Lanbedr yng Ngwynedd, wedi cerdded am 35 awr mewn tywydd crasboeth ac wedi teithio cyfanswm o 850 milltir mewn car.

Gobaith y ddwy yw casglu £1,800 ar gyfer cartref plant yn Kyrgyzstan.

Cychwynnodd y ddwy ddydd Llun diwethaf drwy ddringo Moel Cwmcerwyn ym Mynyddoedd y Preseli.

Naw copa

Roedd y ddwy wedi cyrraedd naw copa erbyn diwedd y diwrnod cyntaf.

O'r gorllewin fe aethon nhw i'r Bannau Brycheiniog wrth i'r copaon fynd yn uwch.

Dydd Iau oedd y diwrnod caletaf wrth iddyn nhw gyrraedd copa'r Wyddfa.

"Fe wnes i fwynhau'r Wyddfa a'r diwrnod olaf yn arbennig," meddai Abi.

"Dim ond dau fynydd oedd ganddon ni ddydd Iau a nhw oedd fy hoff rai."

Profiadol

Mae'r fam a'r ferch yn gerddwyr profiadol.

Dwy flynedd yn ôl fe wnaethon nhw ddringo'r 15 copa yng Nghymru sy'n fwy na 3,000 troedfedd o uchder mewn 24 awr.

Roedden nhw am gael her newydd er mwyn nodi eu penblwyddi arbennig.

Eleni mae Ali yn 50 oed ac fe fydd Abi yn 18 ddiwedd y mis.

"Roeddwn i'n meddwl y byddwn i'n gwbl flinedig ond doeddwn i ddim o gwbl," meddai Abi.

Dywedodd fod y mynyddoedd yn amrywio a'r golygfeydd yn ddramatig mewn mannau.

'Yn falch iawn'

Ei gŵr hi, meddai, oedd yn gyrru'r ddwy o fynydd i fynydd ac roedd wedi dringo sawl mynydd ei hun.

"Dwi'n falch iawn gan fy mod i wedi anafu fy mhen-glin bythefnos cyn i ni gychwyn," meddai.

"Roedd yn llethol, nid oherwydd y tywydd yn bennaf ond oherwydd y pellter.

"... roedd yn wych gan nad oedd glaw ac roedd modd gweld am filltiroedd."